星期五, 9月 01, 2017

「因為有你,宇宙先會存在。」

我嬲左佢。

佢話順路車個女同事返屋企,我知道佢地無野,我知道佢好愛我,但我都係嬲左佢。我嬲佢唔係因為佢車個女同事返屋企,唔係因為佢個女同事坐左我個位,唔係因為佢女同事郁到我D野。

我嬲佢,係因為佢唔記得佢話過個位係留返比我坐嘅。其他人,只可以坐後座。

但係佢就係諗唔通,佢以為係我亂發脾氣,佢以為係我佔有慾強。

講真,唔係我話叫佢留個位比我嫁喎,係佢自己話要留比我嘅,然後講完又唔記得,咁即係點?

總之,我嬲左佢。我無聽佢電話,佢係WhatsApp不停咁道歉,我無覆佢,而且佢道歉嘅重點錯晒,點解佢就係唔知我點解嬲呢?點解咁簡單嘅野佢就係唔明呢?

其實事件發生到而家已經十二日啦,佢不停咁搵我,不停咁道歉,但係就永遠都唔明其實我嬲佢D乜,咁樣只係會令到我更加嬲佢。

然後到左今日,佢黎左我公司樓下等我,我唔想見佢,係佢未知自己有咩問題之前,我唔想見佢。

於是,我行大廈嘅後門走。我一出門口,就有個我唔識嘅西裝友攔住我。

「你好呀,你可唔可以原諒佢呀?」西裝友講。

「你邊位呀?」我答,但係無諗過要停低。

「我係邊個唔重要,重要嘅係,你一定要原諒佢,如果你唔原諒佢,呢個宇宙就會崩塌,所有呢條時間線上面嘅野,都會變成一片混沌。」西裝友一邊追住我一邊講。

「你叫佢自己檢討下先啦。」我繼續行去地鐡站。

「我好認真嫁,首先,你要知道,其實所謂宇宙,係D乜野。」西裝友追住我唔放,我就快想大叫救命。

「再跟住我我報警嫁!」我警告個西裝友。

「呢個宇宙,其實有無限咁多個,即係所謂平衡宇宙。」西裝友繼續講。

當我拎起個電話諗住報警果下,我發現個西裝友唔見左,憑空消失左。

「而所謂無限呢個概念,即係話如果有『無限』咁多隻唔識字嘅馬騮係個打字機前面亂咁打字,你下一秒就可以得到一份《莎士比亞全集》。」雖然西裝友消失左,但係佢把聲無消失到,繼續講野。

我望左望周圍,附近無任何位置可以比個西裝友匿埋的,究竟佢去左邊呢?

「咁點解係無限咁多個平衡宇宙入面,我同你會身處係呢一個上面呢?」西裝友無理我,繼續講:「係因為你嘅意識係度觀察緊呢個宇宙。」

「或者你都聽過『測不準原理』,正確D黎講,應該叫做『不確定原理』。即係話,一個粒子嘅位置同埋動量係唔可以同時被確定嘅。因為你觀測個粒子嘅過程,會影響左個粒子,又或者咁講,你觀測個粒子嘅位置時,個粒子先決定自己嘅位置,你觀測佢動量時,佢先決定自己嘅動量。

所謂嘅決定,係全時間性嘅,即係你觀測果一下,成條時間線上面包括過去現在未來個粒子嘅位置會比你決定。

簡單D講,如果你無左意識,唔再觀測呢個世界,呢個宇宙入面所有野,都會變成一個『未決定』嘅狀態。

又再換句話講,時間存在嘅本身,係因為你有意識。你嘅意識令你身處係現在,因為你可以身處係現在,所以你知道過去嘅現在係過去,將來嘅現在係將來。

如果你無意識,所有時間包括過去現在未來都只係就咁疊埋一齊,係一個『未決定』嘅狀態。」西裝友長篇大論,講左一堆正常人類無可能明白嘅野。

「我退一萬步,當我明你講嘅野,當你講嘅野係啱。問題係,咁同我原唔原諒佢有咩關係?」我停低,問佢,反正都唔知西裝友匿起邊,再走都無意思。

「其實我只係想講你知:『因為有你,宇宙先會存在係呢個時間點。』,如果你唔原諒佢嘅話,我寧願呢個宇宙存在係一個『未決定』嘅狀態。」西裝友答。

「如果係因為有我,先有呢個宇宙,咁其他人呢?點解佢地可以感受到同我同一個宇宙?點解你會同我講野?」我問。

「你會咁問,係因為你唔了解『無限』同埋『未決定』係一個點樣嘅狀態,你唔了解咩野係『宇宙』。

所謂『無限』,即係無論有幾多個其他人,有幾多個時間,有幾多個意識都好,『無限』都足夠去承載佢地。

而所謂『未決定』,就好似將無限個宇宙放係一個棋盤上面咁,直到你『決定』果下先會將隻棋放落去,但果下就會改變左個棋盤。

或者我講完你都係唔會明,雖然宇宙係因為有你先會存在,但你唔明白點解宇宙係因為有你先存在呢件事唔會阻止宇宙嘅存在本身。」西裝友繼續講廢話,講真,我完全唔明,佢不如諗心經或者講文言文可能仲會易明D。

「其實你係邊個?點解我見唔到你但係聽到你講野,點解要黎煩住我?」我問。

「我係可以企後一步,望晒呢個棋盤嘅人。」西裝友答。

「如果有無限咁多個宇宙,點解你要黎搵我,黎影響我呢個宇宙呢?」我唔知自己遇上左D乜野,我只係希望呢件事快D完。

「無,我只係純粹覺得有趣啫。」西裝友講完,就無再出聲了。

我大叫左幾聲,確認西裝友已經走左,搞到成條街D人都望住我,以為我傻左,我勁尷尬咁急步行落地鐵站走人。

「係態度問題、行為問題定身份問題?」佢WhatsApp Send 左呢句黎問我。

「睇黎你都仲係未明。」我WhatsApp覆佢。

打完呢句之後,突然,我諗通左,西裝友至少有一樣野呃緊我。就係無論我原唔原諒呢個人,呢個宇宙都仲會存在,因為呢個宇宙,係因為有「我」先至存在的。

沒有留言: