星期日, 7月 09, 2017

落雨又好煩,停雨又好熱

19390794 469256446751968 5574179170802431176 o

介意哥

呢個月黎,差唔多日日都會落雨,日日都要擔遮,唔係返到公司入面D鞋襪全部濕透,就係聞到自己個身有陣酸酸地嘅雨味;到停雨果一兩日,佢又熱到成三十幾度,將地下D雨水蒸發返上黎,搞到我地一個二個好似蒸籠裡面D蝦餃燒賣咁,剛剛好食得。

真係有雨又嫌煩,無雨又嫌熱。

咁其實我地可唔可以做D咩而唔使咁煩呢?

係講呢個問題之前,首先要搞清楚「天氣」同「氣候」呢兩個概念嘅分別。

所謂「天氣」,係暫時性嘅,係唔穩定嘅,好似你追緊個一個女仔咁,佢果日嘅心情:開唔開心?想唔想睬你?想唔想見你?想唔想理你?憎唔憎你?有無諗起你?呢D野可以受好多因素影響,可能係佢琴日買左件衫、可能係佢工作方面有阻滯、可能係天氣問題,呢一堆野係唔好唔穩定嘅,學術少少講,女人嘅心情,同聽日嘅 天氣,都係一個「混沌系統」。

一個「混沌系統」係極其敏感嘅,只要有少少唔同,最後結果會有好大差別。而且,天氣同女人嘅心情一樣,係一個Level 2嘅混沌系統。

即係話你嘅觀測,會直接影響結果。即係有人同你講叫你唔好理佢,比佢靜下,咁你真係比佢靜下丫,定係買D甜品係佢樓下等佢有得食呢,係直接影響緊佢跟住落黎嘅心情嘅。

又或者咁講,你可以覺得,你出門口之前帶唔帶遮,或者天文台估三日後落唔落雨,其實係對三日後真係落唔落雨係有影響嘅。

但所謂「氣候」呢,係長遠嘅,係要睇個趨勢嘅,好似你追緊一個女仔咁,佢究竟係點睇你兩個中間嘅關係呢?佢有無變得越黎越鐘意你呢?佢諗起你嘅次數有無多左呢?佢有無幻想同你有將來呢?定係佢心入面完全無你呢?呢D野全部都係一個趨勢,佢可能一路變好,可能時好時壞,可能一路變差,但只要睇得夠長遠,佢一定有一個趨勢。

換句話講,「氣候」同個女仔心目中你嘅位置一樣,係一種統計學黎。佢同你一齊嘅時候係開心多D?定唔開心多D?你Send WhatsApp比佢嘅時候,係想覆嘅時候多D,定係已讀不回嘅時候多D?呢十年黎夏天落雨嘅時候多D?定係猛太陽嘅時候多D?呢一百年黎,平均氣溫係上升定下降?

呢D先係我地應該關心嘅問題,趨勢絕對唔係一個「混沌系統」,佢係可以用系統計算嘅,佢係可以有結論嘅,但趨勢有一個問題,就係結論永遠都只係:「相信個趨勢可以繼續」。

當然,因為係統計學黎家嘛,既然呢一百年黎,平均氣溫都係上升緊,我地絕對可以講:「我地相信下一個十年氣溫都係會繼續上升」,甚至可以得出一個結論係精準到「我地相信下一個十年有95%氣溫都係會繼續上升」。

咁問題黎啦,果5%點算?

即係「我相信呢個女仔會越黎越鐘意我」,即使你覺得個趨勢已經無可避免、勢如破竹、遇神殺神、遇佛殺佛。但係,你都係仲有機會失敗。明明佢覆我Message嘅機會率由三個月前嘅25%,已經增加到42%,但佢三個月後會唔會升到55%呢件事你都只係可以「相信」,唔可以肯定。

咁我地應該點做?

我地應該唔好比「天氣」嘅變化影響我地,要專心觀察返「氣候」,然後作出選擇。

例如每日記低天文台嘅天氣預測,然後聽日睇返佢準唔準,有無明明話晴空萬里,到頭來一埸雨淋到你撻皮;有無明明話狂風雷暴,到頭來曬到你甩轆。又或者每日記低你女神嘅心情,今日佢講左十次「OK」同「嗯」,比全年平均少左1.56次;今年佢已經講左三次好想食Lafayet嘅Apple Crumble,佢即日就有人買比佢食嘅機會係100%。

咁你做得一年兩年,時間長左,自然可以睇到個趨勢。你可能會知道天文台大概有85%準確,你可能會知道你追緊個女仔大約有35%鐘意你。

咁你就可以做決定,聽日信唔信天文台好?或者你仲追唔追呢個女仔好?

當然,氣候同女人最大嘅分別,係無論天氣點變,你都唔會太傷心;但如果你真係好鐘意一個女人,無論個機會有幾細,你都可能會繼續追落去。