星期四, 7月 28, 2016

究竟 Pokémon GO 要點先計我孵緊蛋?

我諗有玩 Pokémon GO 嘅人都面對住同一個問題,就係蛋太多、孵蛋器太少同埋行路太少,成個孵蛋機制根本就係卡晒係「行路太少」呢一樣野度。

而孵蛋得到嘅小精靈,傳說係比係街邊流浪等捉嘅IV值高(唔知咩係IV值嘅快D同我去睇呢篇文:(Pokémon GO 能力值解釋)。

而十公里蛋生出黎嘅小精靈,幾乎全部都好難捉到:

Pkmeggmap

 

咁問題黎啦,究竟 Pokémon GO 要點先計我孵緊蛋呢?

好多人都試過搭火車又或者巴士時,架車行嘅距離完全無計過落孵蛋器度,對於大部份住係地鐵沿線而又再係地鐵沿線返工嘅人黎講,咁搞法真係十九幾日都未孵到一隻十公里蛋。

咁網上就開始有好多傳聞,有D人用部風扇貼部電話上去轉就OK,有D人話用四驅車,有D人話要搭架站多加塞車嘅巴士,有D人話搭電車,有D人話踩單車,有D人話用吸塵機械人。

究竟呢堆方法邊D得邊D唔得呢?

我成日都話,做人要科學D,想知得唔得,我地做個實驗就OK。

我假設,「係車上面唔計,而係公園散步就計」呢個現象,係因為火車行得太快, Pokémon GO 覺得你唔係行緊。

即係話,只要架車行得夠慢,佢就會計!

於是我Lunch Time 走左去科學園後面條馬路,做一個實驗黎證實我嘅假設:我會開車好慢咁向前行一公里,然後睇下佢有無計我孵蛋。

 

出發之前,我三部蛋機分別係0.9/0.7/0.7km。

IMG 4337

 

路線係呢條,距離係 1.1km,開始時間係13:31。

IMG 4339

 

係13:34,我到達終點,三部蛋機仍然係0.9/0.7/0.7km。

IMG 4340

 

3分鐘行1.1公里,時速大約係22km/h。
即係話,如果時速高過或等於22km/h,就會完全唔計。

咁我開呢個速度嘅時候,經過D的士佬已經好似想撞走我架車咁,一黎為左保住架車,二黎其實咁大條直路要再開慢D真係有D難度,所以我拎左架單車出黎做實驗。

 

今次出發前,蛋機係2.2/1.9/1.9km。

IMG 4349

 

路線係呢條,距離係1km,開始時間係14:13。

IMG 4349 

到達終點嘅時間係14:24,三部機分別係2.9/2.7/2.7km。

IMG 4350

 

11分鐘行1公里,時速係5.45km/h (原諒我踩唔到好快,同埋我懷疑我個終點位遠左,實際上應該快少少)。
問題黎啦,明明我行左1公里,點解佢計我0.7公里?

我返黎查左一陣網,我知道外國一定有人做過相同實驗嘅。

呢個網就話最高速度大約係10mph,折實返大約 16.09km/h。

至於蝕左三公里,原因可能係呢個網講嘅第七點

egg-hatching will bite right back, as due to a GPS delay, you will often get far less credit for your movement than you might imagine.

佢話,因為 GPS Delay,佢會偷左你D距離。

 

咁我而家可以有個小總結,就係所有行得快過16.09km/h(理論值)或者22km/h(實驗值)嘅交通工具都係孵唔到蛋嘅。

然後我地終於可以回答返上面問題:
1.用部風扇貼部電話上去轉 - 如果你部電話DETECT GPS 準到風扇咁細,而你個風扇又行得慢過 16.09km/h的話,都係唔得,因為佢會偷左你 D 距離。
2.用四驅車 - 呢個明顯唔係好得,因為四驅車其實好快,要佢慢過16.09km/h,就要附好多重量比佢,咁又會好快無電。
3.搭架站多加塞車嘅巴士 – 你架巴士要塞車塞到慢過單車,D站多到佢無法子高過16.09km/h。
4.搭電車 - 之前有人同電車賽跑,你就知,其實電車係好快,快過小明的。
5.踩單車 - 你要踩到好似我咁慢,仲要唔知點解有折扣。
6.吸塵機械人 - 你屋企個 GPS 分唔分到你係廳嘅邊個角落?如果分到,應該OK。

星期日, 7月 10, 2016

2016 歐洲盃決賽賽前分析——葡萄牙對法國

葡萄牙由分組賽比匈牙利遠射省中人連入兩球都追得返之後,好似神功護體咁,首先係第三名出線去左無晒傳統勁旅嘅上線,然後係龍門口開個李氏力場令到克羅地亞一球都射唔中龍,再之後同波蘭射十二碼又球球入晒,最後更加再靠遠射省中人淘汰埋威爾斯。
運氣值一時無兩,可以話係佔盡天時。

而法國隊主場出戰,早就佔盡地利;六戰五勝一負入13球失4球,勢頭可謂一時無兩,球隊圍攻人地時有入波(頭兩場分組賽同埋十六強對愛爾蘭,控球接近六成,有生波入波),比人攻時無失波(對瑞士分組賽),突擊又差唔多球球都入波(八強對冰島,15個射門入左5球),比人狂攻時甚至連球證運都有埋(對德國果球十二碼可比可唔比)。
根本就係主場王者,老實講,法國足球史上,所有主場嘅大賽,佢都係捧盃嘅。

天時 vs 地利,究竟誰勝誰負呢?

 

葡萄牙今晚會做嘅野,可以用一句黎總結,就係「將『好錯足球』進行到底!」。

 

Ronaldogoaalporrtuhga 

所謂「好錯足球」,就係「可能我會好好運,又或者你會出錯。」足球嘅簡稱,上一場四強嘅賽前分析我已經解釋過呢種足球係點踢嫁啦,自己去睇

佢決心無論對手係邊個、擅唔擅長控球、識唔識得進攻、懂唔懂得防守都好,佢地都唔要控球,唔要主動控制比賽嘅節奏。

你有種就去攻佢,佢就係唔係都塞晒D人係後面守,即使拎到個波,佢地係唔會製造機會,最多有得遠射咪試下射,有死球咪斬入禁區搏下,好運咪入波,唔入波咪返轉頭守。呢D,就係「好錯足球」。

「既然『好錯足球』同運氣已經將我地帶到入決賽,或者會帶埋我地捧盃呢?」我幾肯定,呢個係佢地嘅諗法。

所以係今晚,佢地一定會「將『好錯足球』進行到底!」。

睇返一D數據就可以知道,葡萄牙係頭三場分組賽同後三場淘汰賽嘅表現分別有幾大。

 

Screenshot 2016 07 10 01 38 09

 

淘汰賽時嘅葡萄牙比分組賽時嘅佢,每場平均射門少左9次,主要就係因為佢地後三場已經唔想再主攻,射門數通常都係黎自反擊,又或者死球,所以射門數先會下跌得咁西利。
而傳球方面,一場更加係少左近80個傳送,成功率亦都下跌近5%,最誇張係控球,頭三場平均有成61%控球,但尾三場,得44.33%。
而因為打防守嘅關係,通常都要跑動多過進攻果隊多D,所以跑動稍稍多左一公里。

但法國唔係威爾斯,佢地未必會咁黑仔,輸完一球死球(中堅比人KO),再輸一球遠射省中人。所以如果葡萄牙決賽要入波的話,剩返嘅方法就係快速反擊,或者罰球直接射入囉。

但係,翻查返資料,其實C朗拿度係國家隊決賽周總共射左41球罰球,未入過。
咁佢係曼聯同皇馬加埋呢,就射左594球罰球,入左41球,入球率大約係 6.9%。大約每14.5球,就會入一球(其實唔算好高,係歐洲頂級聯賽,隨時可以搵到十幾個過10%入球率嘅罰球劊子手,例如: Zlatko Junuzovic,Miralem Pjanić,Daniel Wass等等,當然佢地 D 數據無C朗咁齊,我只係搵到2013-2015嘅資料, 呢三條友係呢兩年,都係高過14%,而果兩年C朗嘅罰球入球率係6.8%)。

 Cristiano Ronaldo Free Kick Stance 7 6 

點解係國家隊同係球會個差別會有咁大嘅呢?

我估係心理問題,係皇馬,C朗拿度射唔射入個罰球,對球隊嘅勝負影響好多時唔會太大,佢地入波方法太多,罰球只係其中一種。
但係國家隊就唔同,佢成日覺得成隊都係垃圾(其實唔係),得佢一個可以入波,得佢一個可以令球隊贏波(Sorry,都唔係);呢一份壓力,佢唔係好頂得住。
相比起德國足協網頁上面後勤人員有條SCROLL極都SCROLL唔完嘅LIST(當中包括一個隨隊專屬心理醫生),葡萄牙足總係非球員嘅位置,得4個人,一個經理,兩個教練,一個主教練(咁心理醫生我唔肯定佢係無寫出黎,定係真係無啦下)。

 

到主場嘅法國。

 

 Germany v France Euro 2016 semi finals

佢地唔需要靠「好錯足球」,佢地要攻嘅時候,即使大部份時間未入到波,但總會搵到「及時雨」,而面對住瑞士同德國兩隊,佢地雖然比較守勢,但都咬緊牙根,無失到波。

兩年前巴西世界盃,法國隊得一招,叫「人少打人少」(即係快速反擊),當佢地要對住D 類似「好錯足球」咁嘅對手時,會變到老鼠拉龜;而今年明顯佢地係多左招數,學識左點樣攻破對手嘅密集防線。

我地要將法國隊嘅比賽分為兩種,一種係有猜短傳嘅,另一種係無猜短傳嘅。
重點睇一個數字,果個數字叫"Average Pass Streak",即係話平均控球嘅時候,可以猜到幾多腳。呢個數字其他隊好少大過6的(除左西班牙同德國),而法國當佢地控球權較多嘅時候,都可以坐6望7,但較少嘅時候,就得返4。

 

Screenshot 2016 07 10 04 20 53

 

而入球數字,當然係猜多幾腳果時高D(場均2.75球),要打反擊,幾腳就傳去前面時就少D(場均1球)。

咁呢場對手葡萄牙就應該死人都唔攻嫁啦,我估法國都唔會認衰仔學波蘭咁同佢等射十二碼,所以,我地集中睇控球多D果四場。

係分組賽同埋16強嘅賽事,法國嘅攻勢好多時都做落兩邊底線再出返黎中間,咁做嘅原因係因為佢地對Griezmann同Gioud有信心,覺得佢地一個可以搵到空位入楔射波,一個可以用佢身型黎壓倒對手。

 

Screenshot 2016 07 10 04 21 58

 

6場入面,入左3球出波(唔計角球),平均每場有0.5球,三球由唔同球員出波,都係右邊出的。呢D野,我知,葡萄牙嘅教練團隊都應該知,咁佢打算打「好錯足球」,佢應該會叫左邊中場回防多D,希望封死法國呢招。

法國唯有用第二招,遠射!

今屆法國有個人入左三球(又係平均每場0.5球),三球都係禁區頂附近射入的,呢位仁兄,叫Payet。
佢六場入面射左19球,7球中目標,7球唔中,仲有5球比人擋左。

50%命中率!15%入球率!

呢個數字其實好可怕,比較下C朗嘅數字,我地會見到佢入左3球,射左45球,中左11球,17球唔中,17球比人擋左。

39%命中率,6.6%入球率。

ShotAcc

如果葡萄牙連Payet 嘅遠射都頂得住嘅話,法國仲有一招,死球!

今屆法國死球入左4球,3球角球1球斬波,場均0.66球。

如果都仲頂得住呢?

OK,法國陪你射十二碼好了。

另外,我一定要係度讚下法國兩邊閘位(Evra同Sagna)嘅表現。唔講多,直接睇圖:

 

Defense

 

呢兩位一直被香港講波佬由開幕果日質疑到聽日決賽都一定會繼續質疑嘅後衞,其實表現係超好的。無論係攔截、頭鎚、封阻嘅數字都明顯比香港講波佬盛讚嘅德國兩閘好。

我真係再次拜託一下香港嘅講波佬,做多少少資料先,有時有好多野係有數字可以睇嘅,唔好下下感覺行先,唔係大過三十歲就一定無氣打全場,唔係細過22歲就一定前途無可限量,而家網上面有好多免費資源(我就全部都係睇免費野),只要你肯去搵,一定搵到。

講少D無用嘅說話,講多D事實,好多時你憑感覺講一句,D小朋友聽左,咁就一世。

 

講返場波。

我希望聽日葡萄牙好運撞入一球先,咁法國就會焗住痴左線咁攻,咁就會好睇D,入唔入得返就後話。

否則比法國入波先的話,葡萄牙要放棄「好錯足球」,咁佢地就會返返去奧地利都贏唔到嘅狀態,場波基本上完左。

再唔係,兩隊都入唔到波的話,法國去到下半場尾段應該都會加入「好錯足球」嘅行列,因為點都好,輸一個快速反擊就會無左個盃,我唔攻最多都係十二碼。

講到尾,都係「十二碼」呢種判別晉級/捧盃與否嘅方式存在住好大問題,只要十二碼一日維持完狀,就無論如何都無法子係加時或者比賽尾段叫大家主動進攻。

星期三, 7月 06, 2016

2016 歐洲盃四強賽前分析——葡萄牙對威爾斯 2016 歐洲盃四強賽前分析——葡萄牙對威爾斯

對比起下線嘅殺戮戰場,上線呢邊明顯嘅主旨得一個:「可能我會好好運,又或者你會出錯。」

我簡稱呢種足球叫做「好錯足球」,呢種足球好簡單,就係有得攻嘅時候,唔好去攻,因為你深信自己正正常常生波係無可能攻得入,除非好好運,又或者對方出錯。

好錯足球同防守足球好唔同,因為防守足球其實需要對方配合,要對方肯攻你,你先有得打防守足球,先有得反擊。

但好錯足球就唔同,如果對面攻,你梗係要守啦,但如果對面唔攻你,你就無野做,進入一個叫「等運到」嘅狀態。

如果兩隊一齊進入呢個「等運到」嘅狀態嘅話,場波就真係會好悶。

而上線嘅呢堆球隊,本來就限米煮限飯,除左比利時仲有份「黃金一代」嘅驕傲之外(但佢贏最多果場係打緊防反),其他球隊,居然都係一致打緊呢個「好錯足球」。

 

而當中最令人失望嘅,一定係葡萄牙。

 

99421086 Portugal SPORT large trans++qVzuuqpFlyLIwiB6NTmJwfSVWeZ vEN7c6bHu2jJnT8 

點解?
因為佢分組賽時,仲打緊普通足球,仲相信自己嘅球員可以創造到機會,仲相信前場擁有João Moutinho(順帶一提,João係咁讀,讀得夠快會變左「哨」咁音),Nani同C朗拿度呢個組合係可以創造到入球嘅。

但當佢地和完三場之後,佢地放棄,認衰仔,對住克羅地亞時,佢地完全防棄進攻,開始打由奧地利到波蘭到北愛爾蘭都打緊嘅「好錯足球」。
場波打緊嘅時候,佢地不停默念:「可能我會好好運入到D死球,或者遠射射中你彈入,或者佢後衞跣腳失位呢?」
到完左場,要射十二碼,佢地就改為念:「可能我會好好運你龍門捉錯路,或者佢出錯抄飛機呢?」

無錯,就係放棄自己對比賽嘅控制,將晉級希望交比幸運之神。數據化黎講,就係分組賽頭三場葡萄牙控球都係贏對手嘅,分別係66%,59%同58%,而到左分組賽,就兩場都放棄左控球,只有41%同46%。

我地睇下佢地對波蘭嘅時候嘅呢一球,你就知葡萄牙而家打「好錯足球」係痴線到咩地步。

 

POR

 

由73:20秒到74:11秒呢51秒時間入面,佢地猜左19腳波,而呢19腳波,基本上都唔係為左創造機會而踢的(至少波蘭完全唔覺得佢嘅傳球會造成威脅,連搶到廢事)。
唔好忘記,葡萄牙呢場控球係少過對手的,但佢地竟然將辛苦地搶返黎嘅控球權,亂咁交一輪之後掉返比對手。

喂大佬呀,你半夜三點先開波嫁,睇到七十幾分鐘成四點半嫁啦,真係好撚眼瞓嫁。你兩隊都唔想入波,想射十二碼嘅話,可唔可以預先同我講,等我較鬧鐘十二碼先起身睇呀!

但係結果論黎講,葡萄牙的確係用「好錯足球」,入左黎四強。

果日我同我朋友傾計,講開歐洲國家盃,佢話:「葡萄牙今年可能棒盃!」

咁我就問:「佢憑咩黎贏德國?呢隊德國真係三個字『快!狠!準!』嫁喎!」

佢答:「夠運囉!」

我反駁唔到佢。因為足球真係一種非常講究運氣嘅運動,只要你運氣一到,人地點都擋你唔到,葡萄牙其實只要守得住(或者好運對面入唔到),佢有種真係可以法定時間連和七場捧盃嘅。

 

咁講完葡萄牙,講下威爾斯。

Aaron ramsey gareth bale wayne hennessey joe ledley wales 3362111

 

其實講黑馬,威爾斯先係真正嘅黑馬,大佬,佢打左5場,4勝0和1負,全部90分鐘內KO對手。相比其他隊,你會見到冰島就打左5場,2勝2和1負,比利時都係打左5場,3勝0和2負。

除左主場嘅法國之外,無一隊戰績比威爾斯好,包括3勝2和0負嘅德國。

但係四強入面,奪冠賠率最冷嘅,竟然係戰績第二好嘅威爾斯。

舉個例,你上次全班考第,但你今次考試考第一嘅賠率竟然低過考第5同考第7果個,好得人驚。換言之即係全人類都覺得你唔得,無人明你點解考到第二,覺得你下次一定仆街,你無理由考到第一嘅!

等我黎話比你聽,呢隊威爾斯點解可以考到第二。

 Screenshot 2016 07 06 03 29 54

 

 

因為佢射門轉化為入球嘅比率,係24隊裡面,第2高,有15.79%。只係輸比差唔多射親波都入嘅冰島(痴線嫁,接近20%),但佢地射波次數比冰島多成19次,當佢每射6.25球就入一球,射多19球,即係入多3球。

法國上場係冰島身上斬左五球返黎,每射3球就入一球,拉高晒之後都只係得12.94%。

又有D人話威爾斯今次好大鑊,因為藍斯停賽,咁我地又黎睇一睇,究竟藍斯停賽對威爾斯嘅影響有幾大啦。

 

 Screenshot 2016 07 06 04 56 53

睇返呢個表,係5場入面,藍斯共傳球192次,佔左全隊1406次入面嘅13.65%,分開5場,為左簡單D,我地平均計,即係佢一場傳球38.2次。
即係話如果無左藍斯,換返一個同全隊平均數差唔多嘅球員,即係1406/11=127.81次,分返5場,即係一場傳球得返25.56次(通常龍門同前鋒傳少D,不過唔緊要啦,我地當誇大無左藍斯嘅後果)。

咁係傳球方面,呢一場波90分鐘內,威爾斯整隊就會少左藍斯平時額外提供嘅12.83次傳球。

而射門方面,藍斯共射門6次,有一球入波。又一次,分開5場,即係佢平均一場射1.2球,而有0.2球會變成入波。
換返一個全隊平均值嘅球員入場,即係射門5.545次,有0.909球。分開5場,平均1.109次射門,入0.181球。

搵左藍斯走,威爾斯預期今場會射少左0.0909球,入少左0.018球。

 

咁我地再黎比較下,如果德國無左奧斯爾,會變左點,咁應該比較易明。

 

Screenshot 2016 07 06 04 56 44

 

傳球方面,一場會少左4.63個傳球,少左0.472個射門,少左0.07個入球。

我可以簡單講一句,其實無左藍斯,對威爾斯嘅影響其實無一般人想像中咁大,無左藍斯,唔會係世界末日。

 

總結一下。

拿,我就點都唔會話呢場波係咩C朗對巴爾嫁啦,大佬,足球比賽係隊際運動黎,想玩英雄主義,唔該去睇網球、羽毛球又或者其他一個人可以玩嘅運動。

一個球場入面有22個人,每個人都做好佢自己嘅本份,贏輸可能係因為技術嘅分別,可能係因為運勢嘅分別,可能係因為體能嘅分別。

但如果贏波時就C朗巴爾,輸波時就賴隊友唔入單刀又或者包越位,咁比我係佢地D隊友我就亂踢啦,反正輸係輸我,贏係贏你。

況且事實根本唔係咁,唔係有人係前面攻下,後防回唔到氣就會輸波;唔係有後防守住,前面入幾多球都無用;唔係有中場傳波,企係前面嘅人只係一件雕塑;唔係有人拉開空位,進攻球員只會比三個守衞圍住,動彈不得。

老土D講句,勝利,從來都係屬於成隊人嘅。失敗,亦永遠唔會係一個人嘅錯誤。咁先係隊際運動丫嘛。

星期六, 7月 02, 2016

2016 歐洲盃八強賽前分析——德國對意大利

自從兩年前德國係巴西棒盃之後,香港有大量「忽然」德國球迷出現,加上本來數目就唔少嘅德國死忠,德國而家可以話係香港最多人捧場嘅國家隊。而意大利則因為意甲自2006年假波事件後資金大量流走,加上踼法唔係人人受得住,可以話已經係明日黃花,算係香港最少人支持嘅傳統勁旅。

咁兩隊都的的確確係傳統勁旅,夾埋擁有八個世界盃,四個歐洲盃。歐洲盃德國入過六次決賽(2008,1996,992,1980,1976,1972)贏左三次,而意大利就入左三次決賽(2012,2000,1968)贏左一次。

兩隊對踫,真係未開賽先期待呀。

 

咁講下德國先:

Screenshot 2016 07 02 02 15 11

 

德國國家隊最強嘅地方唔止係佢地嘅球員或者教練,佢地強在擁有一隊超級專業嘅後勤團隊。
德國早係確定出線之前就已經訂好訓練基地同附近嘅頂級酒店,有咁長嘅準備時間同咁充足嘅BUDGET,真係連紐亞個帎頭都可以度身訂造一個,然後剩係放係佢間酒店房等佢用。
加上隨團嘅頂級廚師、由德國直送嘅食材、甚至食水、等等等等濕碎野,全部都準備萬全。
就係為左令到班球員係「食住」呢兩方面同佢地係屋企一樣,有時所謂主場之利,不過就係食同住兩點嘅分別而已。
你去外國有時都會因為D野太鹹又或者D水太硬而個肚唔舒服,但德國絕對唔會有呢D問題。佢地隨團有兩個體能教練,四個隊醫,一個心理醫生,四個治療師,呢個陣容放眼任何一隊國家隊都算係超級豪華,除左保證佢地唔好唔舒服,亦防止佢地受傷或者過勞。

 

Screenshot 2016 07 02 00 30 45

 

呢D你可能都覺得只係基本野,但其實好多國家隊真係連咁嘅基本野都做唔足或者做唔齊,輸左都無得怨人(眼望阿根庭)。

除左基本野之外,其實德國國家隊仲發展左好多先進嘅運動科技。

例如佢地同 SAP(世界上數一數二嘅Entreprise Resources Planning System)合作,開發左一套足球大數據系統,入面有齊呢幾年所有頂級賽事嘅數據,由跑動線道,到傳球成功率,應有盡有。等德國嘅教練團隊可以仔細咁分析自己球員同對手,定立勝率最高嘅戰術。
當中甚至包括一套放係更衣室嘅 iPad 即時系統,等每個球員可以收到同重溫教練比佢地嘅個別指示。

單單係呢D後勤嘅支援系統,就足夠令德國世界盃屆屆入八強,同埋係比賽開始之前已經確立左優勢。

而係場入面,德國隊亦都非常厲害。我可以斷言,整個歐冠盃入面,速度最快嘅就係德國隊。
今屆賽事分組賽連同十六強總共打左44場,呢44場入面,控球比率高D果一(當中有2場控球打和),平均係跑107.25公里,而且都會跑得比控球低D果隊少D(25場/42場)。
而德國打左4場,佢地4場都贏控球,最少都贏18%(對斯洛伐克,59%:41%),但佢地四場入面嘅跑動都係高於平均嘅,分別係113.6公里、109.6公里、110.9公里同埋112.3公里。
平均黎講跑多其他隊4%左右,由於速度等於距離除以時間,而每一場嘅法定時間都係90分鐘(加時嘅距離已調整),所以我可以話德國係平均比其他佔有控球優勢嘅隊快4%。

又或者有人會講:「車,計距離有咩用,佢十一個人搵其中一個匿埋係角球旗個位穿梭跑刷數據都得啦!」(典型嘅數據無用論者嘅理據)

但講果人,又有無諗過呢種「刷數據」係對球隊有咩幫助?如果無誘因,又邊個會做?

好,咁就當我睇數據紙上談兵,我地而家轉去現場睇下,我翻睇左德國對烏克蘭嘅上半場,抽左前中後三段時間,分別MARK低左佢地平均足球上腳嘅時間。

得出下表:

Screenshot 2016 07 02 00 31 42

 

咁為左有得比較,我又去睇一次比利時對愛爾蘭,睇下用同一種方法睇「強隊」比利時,同德國會有咩分別。

得出下表:

Screenshot 2016 07 02 00 32 04

 

你見到德國隊節奏明顯快好多。由控球到離腳時間快 2.47秒-1.69秒=0.78秒,平均控球時間則快 0.855秒-0.712秒=0.173秒。
所謂「天下武功,唯快不破」,如果以行軍速度黎計嘅話,德國絕對係呢廿四隊決賽週球隊當中嘅Number One。

而且德國係Teamwork 方面亦都係數一數二,我地可以睇下呢兩個 PASS MATRIX,我 HIGHLIGHT左D大過10次嘅互傳數。

 Screenshot 2016 07 02 00 21 49

Screenshot 2016 07 02 00 21 33

 

 

你就可以睇到,「獨食」呢件事,係德國隊係唔存在嘅(比利時 做對照),佢地成隊人一心一意,為左球隊而服務。其實傳波傳得多,自然速度就會上升,點計,個波都一定快過你個人,而對手對住快速傳球,可以做嘅野其實亦都唔多。

講左咁耐,講到呢隊德國天上有地下無咁,咁佢地其實,都係會輸波嘅。
我始終覺得佢地防守太陰柔,太斯文,(我忍唔住啦)亦係我成日講,太乸型。你踼足球唔可以踼到好似羽毛球咁,當人地快狠準地對你反擊嘅時候,你一下諗住唔拎牌,果一下可能就會輸波。
而今屆平均入球只有2.00球!
你輸一球,就輸左一半。

 

好,咁講下意大利。

Screenshot 2016 07 02 02 14 47

 

意大利最大嘅優勢,唔係佢地球員嘅個人能力,亦唔係佢地嘅速度又或者後勤力量(意大利人出名做野又慢又HAE)。
佢地最大嘅優勢,在於戰術素養。呢23個係意大利青訓體系下成長、工作嘅球員,佢地自自然然咁就知道自己係球場上唔係一個人,而係球隊嘅一份子,佢地有責任去做好教練比佢嘅任務,呢樣野係大過自己本身想入波,想出名果種慾望嘅。

咁即係點?我估有好多人都睇過意大利守比利時果段嘅片(Link:https://youtu.be/R_y4aQ8kSEY),感覺就好似古羅馬嘅方陣士兵咁,一進一退,完全跟足FORMATION,唔會有一個走錯,唔會有任何一個人走少一步。

呢樣野有幾得人驚?

你問西班牙嘅教練迪保斯基,佢就講到比你聽有幾得人驚啦!
係分組賽最後一場手握6分鐵定出線嘅情況下,出晒十一個主力。原因只係得一個,就係唔想十六強嘅時候對意大利。
當然佢失敗左,十六強對住意大利,仲輸埋。

果一場D講波佬係度講咩西班牙未入局,唔夠集中精神,真係放屁。明顯係意大利發揮得好啦,干地嘅戰術非常機動,睇準西班牙兩翼助攻會留低空隙,所以用兩邊去牽制佢,一邊減低防守壓力,一邊睇準機會反擊。

而好多人都話廢嘅柏利(咁你用托迪、迪比亞路、雲尼亞尼、維埃里、馬沙路嘅水準去比,佢一定係廢啦),其實佢係意大利前場一個非常重要嘅橋頭堡,如果你有留意,後場拎左波之後傳上去嘅第一點,通常都係柏利,而柏利係呢點上做得好好,極少極少頂輸或者失控球權,幾乎每次都可以比到左右兩邊衝上黎幫手嘅對友。

 Screenshot 2016 07 02 01 32 14

 

 

呢張圖可以睇到佢主要係中場前少少拎波,然後分兩邊,有兩次黃色的 KEY PASS,包括比EDER 單刀果一下。

呢種橋頭堡可以拎後方有喘息機會,唔會解圍左之後,馬上又比人攻返上黎,係呢隊意大利黎講係非常重要嘅一環。

事實上意大利果場控球只係輸比西班牙18%(59%:41%),以西班牙黎講,算好低。

另外一樣不得不提嘅,就係跑動距離,面對住意大利,係時候收返起大家對年齡果種迷信,改為相信返數據。事實上,進行左嘅44場比賽入面,跑動最多嘅球隊,就係意大利。

 Screenshot 2016 07 02 01 42 06

 

 

頭十隊跑動最多嘅賽事入面,有三場係意大利跑嘅。

即使計埋出左線之後HAE打對愛爾蘭果場,意大利平均跑動距離都有113.75公里一場,高過總平均數107.7公里大約5.6%。
而意大利嘅平均年齡,係驚人嘅 28.9 歲,出場嘅十一人仲成日都超過30歲。

咁我又忍唔住要搵最「年輕有為」「新星輩出」但係「不幸出局」嘅英格蘭黎比較下,佢地23人名單平均年齡25.8歲,平均跑動距離係107.85公里。

嗯,「呢個球員過左三十歲,佢會唔會唔夠力踼全場?」

呀講波佬,我唔識答你,我剩係知你好喜歡果班後生仔係球場郁得比班老人家少。真係,知唔知個「醜」字點寫?

 

PhpDUD4tL

 

所以我地可以打破大家對年齡果種迷信,事實就係24隊之中第4高齡嘅意大利,跑動係24隊之中嘅第一位。
但同樣係跑動多,點解我會話德國係速度快,而無話意大利係速度快呢?

咁又要講返控球比率,意大利嘅控球比率呢,贏波果三場都係低過對手嘅,即係話,佢地防守嘅時間係長過進攻嘅時間,跑動時亦都係無波係腳嘅防守跑動多; 相反德國4場控球都係多過對手,佢地跑動時係有波係腳進攻嘅跑動多。
一隊係主動提升速度(德國),另一隊係啱啱快過你少少所以守得住(意大利)。

咁意大利有咩缺點?
我好簡單講,佢地其實唔可以輸第一球。
呢隊意大利點解叫做「有史以來最弱意大利」呢?咪就係因為進攻球員唔夠亮眼囉,講真,十幾年前,你同我講ZAZA 呢 D咁嘅人可以著起件藍色衫,我就死都唔信,大佬,佢咁嘅質地,連丹麥個中堅賓都好過佢啦。但事實上,佢而家真係著到件藍色衫,仲出過場添。
所以如果佢地失一球先,其實真係唔知有咩方法可以追平或者反勝,又係果句,今屆平均入球得2.0球咋,比人入左一球,就輸左一半啦。

最後講下兩隊往績,就會發現,係有競爭性嘅比賽入面,德國係未贏過意大利的。

Screenshot 2016 07 02 02 30 08

不過又咁講,紀綠係要黎破嘅,係咪?