星期二, 2月 16, 2016

公民黨於新東補選的唯一出路

新界東補選,照目前情況發展,好大機會由周浩鼎勝出。因為佢唔單止盡攬所有民建聯既鐵票,更有鄉事票皇袍加身,加上新移民義無反顧既支持,大約有45%既選票已經袋袋平安,可以話,係訓係度選。而另外果55%票呢,先由剩返六個人瓜分,真係你一個人要拎呢度入面九成票,先有可能贏。

而且如果輸左,後果可以好嚴重。而家如果想修改議事規則,一定要功能組別同直選議員都通過先得。如果呢一席比民建聯拎左,只要曾主席落場投票,就可以修改議事規則,到時分分鐘剩係可以投贊成,投反對要被趕離場都似。

如果我係公民黨,我可以點算?

難度咁高(要拎到非鐵票入面既90%),但後果咁嚴重(被修改議事規則)。

但其實解決方法好簡單。
打棄保牌,全力支持梁天琦奪得議席。
點解?所謂棄保,唔係應該棄低票果個,保高票果個嫁咩?
楊岳橋點都高票D啦(唔確認,唔知點解咁覺得)!

正常黎講就係,但今次唔同。通常棄保中兩個候選人都有同一理念既,但本民前係「被修改議事規則」呢個理念上面,其實完全 Don't give a Shit(中譯:東急阿雪,關人蛋治)。如果佢入到去,佢一定唔會投票贊成修改議事規則,甚至建制根本唔會啟動呢件事;但如果比周浩鼎贏呢,本民前亦都唔介意,反正呢班小朋友覺得議會一早失效,入去只為搞更多更激烈既抗爭。

但係,我(公民黨)介意丫嘛,至少我地(公民黨及其支持者)不停拎呢點出黎叫人投楊岳橋啦。

如果我係比較介意果個,咁take action既責任,就係我身上嫁啦。
即係戀愛咁,個男仔對我無乜特別感覺,我就要諗辦法追,約佢食飯,送下小禮物,著件靚D既衫,乜都要做嫁啦。除非,我唔係真係咁鐘意個男仔啦。如果我唔係咁鐘意佢,咁梗係等佢追我啦。
所以,只要楊岳橋高調宣布放棄,全香港人都只會得到一個message,就係:

「我寧願唔要個議席,都唔想比建制派改議事規則!」

即使我(公民黨)唔係真係咁介意個後果(被修改議事規則),我地(公民黨)都應該棄楊岳橋,保梁天琦。
點解?
因為公民黨係一個有未來既政黨,公民黨係一個將要執政既政黨。所以今日有就係分歧點,公民黨要選擇有未來既盟友。首先睇下我地(公民黨)而家既盟友有邊D?

1.民主黨
香港有史以黎,最多人叛變投共既民主派。
換血換血講左二十年都仲未換到,完全老人政治既最佳範本。
最近年初一出份聲明,語氣同用字都同民建聯同聲同氣。
直接與年青人為敵,這個政黨,是沒有未來的。

2.工黨
政改表決時,何秀蘭居然話點人數。
黨內年青人知名度唔高,明顯青黃不接,而且多次阻礙年青人抗爭。

而相比起民主黨、工黨呢D傳統泛民,本土派既年輕支持者數目多太多。如果睇未來,一定係同本土派結盟著數。咁要結盟,你要釋出善意,呢個世界上,有咩抵得過用一個做半年既爛鬼補選議席黎換整個本土派既支持?
記住半年後又要選啦,到時,所有年青人一定對你刮目相看。

公民黨係一個將要執政既政黨,而要執政,其實唯一一條路就係要係組建政府呢件事上拎返話事權(無論係真普選、建國、獨立、城邦、乜乜乜,都係要係組建政府呢件事上拎返話事權啫)。
到拎返話事權果日,香港相信已經係年青人既世界。

又即使我(公民黨)唔係真係想執政,唔係真係想有未來,我地(公民黨)都仲係應該棄楊岳橋,保梁天琦。
點解?
因為公民黨想係體制內抗共,但如果九月立會選舉比建制派大勝,根本就泥牛入海,一去不返。

而四年前既立法會選舉,你可以睇到共產黨係配票方面既威力,佢地差唔多可以精準到百位數地配票。
佢地靠咩咁做呢?無錯,就係情報。
而今次立法會補選,就會係最新鮮熱辣,而又赤裸裸既情報。
如果楊岳橋繼續選,即使佢真係贏到個半年既議席,建制派則會得到重要既配票資料。係分組點票既規則底下,九月建制派將會贏到盡,會出現贏票輸議席既悲痛事件。

所以棄楊岳橋,保梁天琦,不但狠狠咁刮梁振英一巴,而且又可以增加九月既勝算,何樂而不為?

墳總有一句講得最岩:「人人齊撐梁天琦,踢走匪共創傳奇!」

同區候選人有: 劉志成,黃成智,周浩鼎,梁思豪(體雕大狀),方國珊(哪吒),梁天琦,楊岳橋

P.S. 原來香港無得退選,可惜可惜。

星期二, 2月 09, 2016

各打五十大板之前,停一停,諗一諗

2016年二月九日年初二零晨,發生左件咁既事:

12717611 856492027792740 3062015334703188551 n

果晚我一路係Keyboard 前面撐到朝早七點半,終於頂唔住訓左。
第二朝一起身,不出所料,鋪天蓋地spin晒你班友做暴徒,話差佬生命受到威脅。呢個都唔係最可怕,最可怕係,一堆人各打五十大板:

「過年唔執法係人情,執法係道理。」
「佢拎槍射係唔啱,但你拎野掉人都有錯。」
「無論點都好,咁樣對件事無幫助。」

我相信好多人都有呢個諗法,但呢個諗法好錯。

點解咁講?

1. 「退後一步,愛與和平,你有唔啱,佢都有錯」呢句係廢話黎
當一句說話,無論幾時講都啱既時候,呢一句,一定係廢話黎。呢個係邏輯問題,係事實問題。
二次大戰日本軍殺死好多人,但退後一步,愛與和平,日本人梗係唔啱,但係你打遊擊都有殺人,你都有錯。
九一年盧旺達種族大屠殺好恐怖,但退後一步,愛與和平,胡圖族人屠殺一百萬人係唔啱,但圖西族遊擊隊擊落人地架飛機,上面都係人命。
例子唔講咁多,總之呢句野就係萬能KEY,係廢話,係垃圾。
唔想成為蔣麗芸議員,我建議你唔好講咁多無用既說話。

2. 雞蛋與高牆,我永遠企係雞蛋果邊
有好多人認同呢句說話,然後,係今日,呢堆人入面一個個咁譴責示威者,割蓆,唯恐有人要叫你暴徒。
而對差佬呢?就話叫佢調查是否恰當並交代。
呢D叫咩?
呢D叫自己推翻自己呀!
明明一邊係「you no gun」既示威者,另一邊係實彈,胡椒,衝鋒車既差佬,你對一邊未審先判,一邊調查清楚。
所以係企上道德高地各打五十大板之前,諗清楚,你既「初衷」係乜野,究竟你想作為香港人和平地被圈養,定係想作為香港人有尊嚴地生活。
所謂對錯,有時要睇目的。

3. 有用無用,唔係今日會知道既事
「醫生,打左針,快D好丫嘛!」
對唔住,香港而家唔係感冒,而係生左寄生蟲,仲有比人鍊住個春袋。
如果無用就唔做,咁大家可以一齊返屋企睇CCTVB,繼續覺得警察英明神武,自己生活幸福快樂。
做唔到既話,唔緊要,你仍然可以乖乖地坐係屋企睇Facebook睇電視,但係當有人出黎為你做野既時候,你唔好阻住人。
唔理佢用咩方法,有無用,佢自己要承受結果。而呢一個結果,唔包括你對佢既說三道四,因為你無資格。
呢個地方行動既人太少,而嘴炮的人已經太多。
歷史係一條環環相扣既鎖鍊,你只可以扣上去,唔可以解返落黎,每件事都會成為下一件事既原因。
認清呢一點之後,你就知道所有野已經返唔到轉頭。

咁我地應該做咩?

我成日都話,抗爭,可以好有創意。
呢一刻,就係要發揮你創意既時候,諗下自己可以做乜,諗下自己擅長做乜,諗下自己為左呢個社會可以付出D乜。
你又唔係無腦既藍絲又或者盲目既港豬,你一定有你自己既諗法。

我係咁意舉個例子:
如果有一日大街大巷出現幾個紙箱,上面寫住「送給警渣的禮物,閒人勿近」,入面裝住一堆無用既泥膠同電線。
咁會點呢?
係咪會有人上門拉我亂掉垃圾再罰千五蚊?

拿,我講下嫁咋,做既話,自己要承受結果。

如果真係為左未來,大家真係要考慮清楚,究意你願意為呢個社會付出D乜。
係Facebook上面各打五十大板之前,停一停,諗一諗。
Unfriend所有同你爭拗既人之前,停一停,諗一諗。

星期四, 2月 04, 2016

睇《家有囍事(加長版)》,你係謀殺緊香港電影

我敢講,如果《家有囍事(加長版)》票房多過一千萬,咁香港電影就會從此玩完。

其實道理好簡單,一套1992年既電影,你重制,你數碼修復,你出BluRay碟,你送韓國版既十幾分鐘,成本同由頭做一套戲,可以話係差天共地。
如果我求其推套舊戲出黎賣下集體回憶就平平安安袋過千萬的話,咁有邊個老闆仲會比錢拍新戲?

可以想像,如果《家有囍事(加長版)》大賣,咁2017年既賀歲片,會變成以下既樣子:

黃百鳴同學作品:
花田囍事(加長版),加插許冠英大量戲份!

王晶同學作品:
逃學威龍3之龍過雞年(完美版),朱咪咪同陳百祥感情線連做二十分鐘。

曾志偉同學作品:
運財五福星 (IMAX版),彭丹完美濕柴超大螢幕依字馬。

劉偉強同學作品:
決戰紫禁之巔(3D版),招天外飛仙打到你面前!

連最穩賺既賀歲片期都無人投資的話,其他淡季又點搵人掉錢?即係話,其實只要你比幾十蚊入場睇《家有囍事(加長版)》,就可以令港產片消失於呢個世界上。
可以令片商同院商樂此不疲地翻炒昔日既經典搵真銀,可以令新既電影變得少之又少。
如果你好討厭香港,好討厭港產片,好討厭香港文化,你一定要入場睇!
只需要幾十蚊,你就可以幫手將香港電影送上斷頭台。

但我覺得現今香港講得出「好討厭香港,好討厭港產片,好討厭香港文化」既人,有一個好偉大既代表,佢個名叫梁振英。
所以成個場,其實得梁振英一個睇就夠啦。大家真係唔好入場睇,大家亦都無理由要謀殺港產片姐係咪?

講返黃百鳴,其實佢真係有一鋪賀歲片癮,由1985年拍《恭喜發財》開始,到2015年既《浮華宴》,黃百鳴一共監制左16套賀歲片。如果把擔任出品人也計算在內的話,就再多一套由杜琪峰執導的《吉星拱照》。這些片不外乎都是熱熱鬧鬧,片尾演員突破第四道牆和觀眾拜年這些定式。(其中《浮華宴》非常好睇,未睇過一定要搵黎睇下)

然而,我幾年前都發現,黃百鳴既賀歲片,其實係一份香港經濟既寒暑表黎。唔知巧合定點啦,無佢既賀歲片既年份,通常都有D唔好既事情發生。
可以參考下表:

Wpm1

可以見到六次金融大事件入面,有四次都係發生係果年無黃百鳴賀歲片既年份入面。而2000年既《大贏家》之後既空窗期,除左科網係當年爆破之外,仲發生左香港重光以黎最大既災難,SARS。

其實我成日諗,既然有人研究「秋官效應」,點解無人研究黃百鳴賀歲片效應既呢?
下圖係佢賀歲片上映時間同恒生指數走勢:

Wpm2

原來當佢年年有賀歲片時,個市係KEEP住升嫁!最可怕係1998年《九星報喜》同2000年《大贏家》中間隔左一年,就剩係果年插落去,就係果年發生「亞洲金融風暴」呀!

之後2008年金融海嘯發生,跌到仆街,但佢一出黎整返套《家有囍事2009》,個市就幾年都大勢係升啦。
所以結論係咩?

今年黃百鳴介乎起有賀歲片同無賀歲片中間,完全係未知之數。
但為左香港既經濟同埋香港既電影,我求你2017年點都拍套新既賀歲片啦,好唔好?

 

最後 利申,我完全唔識金融,純鳩UP的,不喜勿插。