星期三, 11月 18, 2015

《Fallout 4》絕對係精神鴉片

hqdefault

「當我知道我玩左幾十個鐘《Fallout 4》既時候,已經浪費左太多時間;
我好想寫篇文,同你地講《Fallout 4》真係會玩上癮。
但係我要話比你地知,唔好開始玩《Fallout 4》,無論點都好,千祈唔好開始玩《Fallout 4》。
如果我無開始玩《Fallout 4》,我根本唔會係到同你講我上左癮呢件事。」

我開頭以為《Fallout 4》係《Call of Duty》D Friend,而自己又唔擅長FPS,所以無諗過會買或者玩。

我有個朋友聽到我咁諗,即刻send左條youtube link 比我:
https://www.youtube.com/watch?v=nvqm_pPD-aQ&list=PL7pGJQV-jlzD17YNNbt103xp0PkkUCoPU

我一睇,就睇左三個幾鐘,成個Season 1睇晒。因為真係好好睇。

之後,我衝落樓下Game鋪掉低$380拎走隻Game,然後連續五日,我花左超過五十個鐘頭係呢隻Game上面。買返黎第一日就打到五點先訓,第二日順理成章射波再玩一日,之後星期五晚玩到天光比屋企人屌,到星期一先真係返返工,實在太痴線了。

就好似有人比支煙槍我吸左一啖,然後我就係煙館裡面五日無再返過出黎一樣。

因為呢隻Game,絕對係精神鴉片黎!

 

宏大既世界觀

clip_image004

首先吸引我既,一定係呢個系列宏大既世界觀,佢講2077年10月23日發生左美國同大中國既大型同歸於盡式核戰,而故事就係核子武器毀滅世界後既210年,即係2287年開始。

我本來就對末日後會發生咩勁有興趣,睇埋睇埋咁多末日電影,末日小說,咁呢d世界設定通常都會有一個問題,就係設定得唔夠細緻,無真係用心咁諗個世界會變成點,求求其其打爛晒d建築物,有堆人變左奸既,又有堆人比奸人奴役,然後主角就打贏奸人,救返大家咁,咁實在太行貨,同埋太無聊了。

《Fallout 4》既世界入面,除左有人類之外,仲有以下幾種智慧生物:

— 受左少少幅射,死唔去,但異變左做類似喪屍既長生不死人種:Ghoul,佢地有D漫無目的咁係Wasteland遊蕩,有D就因為腦部都被幅射整壞,週圍咬人。

— 受左幅射異變,又或者比美國戰前發明既Force Evolution Virus 感染,而變成類似Hulk既強裝生物:Super mutant,佢地覺得自己係進化左既人類,高等過你,可以除時踩死你呢D螻蟻。

— 由避難所成功避過核戰既精英科學家製造既人型機械人,有獨立思考同感覺,有時甚至唔知自己係機械人既種族:Synth,佢地有D繼續為精英科學家服務,有D則同人類一齊生活。

而人類入面,亦都有好多唔同既組織,個個各懷鬼胎,有自己既信念,自己既目標。簡單黎講,就係呢個世界入面其實無忠奸,只有立場。其中有:

— 專門尋找戰前科技,為左呢D科機不惜使用一切手段既兄弟會:Brotherhood of steel

— 為左保護農民而組成既民兵組職:The Minutemen

— Synth既製造者:The Institute

— 幫助Synth脫離The Institute既秘密組織:The Railroad

仲有好多好多,關係千絲萬縷。

我真係聽到都覺得個設定吸引,呢個係一個真實既世界,而唔係童話世界。而只需要幾百蚊,你就可以係呢個世界入面暢遊啦!

 

自由既角色塑造

2935918-trailer_fallout4_specialstrength_20150910

有一個宏大既世界之餘,《Fallout 4》另一個賣點就係你可以自由咁塑造你自己既角色。遊戲入面有六種能力「S.P.E.C.I.A.L.」,分別係:

力量(Strength)、感知(Perception)、耐力(Endurance)、魅力(Charisma)、智慧(Intelligence)、敏捷(Agility)和幸運(Luck)

呢幾種能力既搭配令你成為一個獨一無二既角色。例如你可以選擇點滿力量(Strength)同耐力(Endurance)衝上去敵人面前直接打死他,又可以選擇敏捷(Agility)同感知(Perception)令你成為狙擊手,遠距離擊殺敵人。

仲有好多好多唔同既配搭:

魅力(Charisma)加智慧(Intelligence),所謂吹水型,直接同敵人傾計令佢倒戈或者投降。

力量(Strength)加敏捷(Agility),忍者型,潛行去敵人後面,一擊斃命。

敏捷(Agility)加幸運(Luck),行運超人型,用運氣反彈子彈打死對方。

最有趣既係,無論你點分配,你最後都可以完成到遊戲,每種類型都有自己優勢同缺點,例如我玩「吹水型」基本上面一講野就全部贏晒,但係單對單對住著同Level怪我都會死。

其他遊戲好少有咁自由既設定,往往消滅敵人只係有一種方法,咁而家一隻Game,幾種享受!甚至乎你用一個類型爆機一次之後,再開第二個類型,完全係當第二隻Game咁玩。

但我而家玩左幾十個鐘,都仲未玩完主線任,估計玩完要百幾二百個鐘;重開即係又再黎多百幾二百個鐘,一生有幾多百個鐘呀!

 

做極都做唔完既任務

你以為一個咁自由既game你入到去個世界會漫無目的?錯啦,呢隻Game除左一個宏大既世界之外,仲有極為細膩、動人同精彩既故事,佢透過海量既任務,黎交代故事既發展。

你係個城度撞到某條友,又或者係酒吧聽到某個消息,後面可能就係一串遊玩時間長達幾小時既任務線,每條任務線既故事都有一部電影既份量。而呢D任務串又多到令你覺得好似做極都做唔晒咁。

最厲害既係,你既行動會影響到個故事既發展,於是你不斷估劇情會點發展,等自己唔好作出錯誤既選擇,完全令你置身係呢個世界中間,D任務串一旦開始左,你就停唔到落黎,不斷要求自己玩落去,好似中左降頭咁。

 

玩《Fallout 4》,送《The Sims》

今集仲有一個起Settlement既功能,據講完全唔影響劇情,但係一旦開始玩,就好似玩《The Sims》咁,停唔到手。

你會救到D人,佢地會聚居係個Settlement度,而你就可以起屋比佢地住,起田比佢地種,仲有起防衛工事防止比賊人襲擊,望住佢地自給自足,你會好有滿足感,覺得自己係一個市長。

然後心入面想成為設計師果團火又會無端端被燃起,開始諗點樣砌D屋先靚,增加左既人口應該放邊度咁。

最邪惡既係,一個核戰後既世界,資源係勁缺乏既,你起屋要用既木呀、鋼呀、水泥呀呢D材料,你係要出去執既。呢隻Game周圍都有垃圾比你執上身,例如放係枱既風扇、打字機、寫字板,乜都可以執起拎返Settlement,再拆左佢地黎拎D材料起野。

咁最後你為左砌一間靚靚既屋企,你就要出街拾荒,執夠材料再返黎起。

執一執,起一起,抬頭望下個鐘,屌,又玩左兩個鐘,而時間已經係四點,第二朝仲要返工。

我既時間比時間小偷偷走左。可惡既《Fallout 4》!還返D時間比我呀!!!

星期三, 11月 04, 2015

2014 - 2015 值得入場支持的電影

 

香港電影,需要香港人既支持

所謂支持,就係只要佢地有努力去做,無論結果好壞,輸贏,你個人覺得鐘唔鐘意,都會「撐」既意思。

就好似有人喜歡利物浦,但佢其實唔係成日贏波,唔係場場都踼得好;但係利迷係唔會因為輸一兩場就唔再鐘意自己隊波,佢地會繼續買波衫、比月費睇波、甚至飛去英國朝聖。

然而,香港電影,從來就只有很少量、很少量這樣的支持。

呢幾年其實好多小本制作都相當好睇,當然唔係完美,每套都有佢本身既缺點同限制,但好值得支持,因為佢地有努力去做,落到場,盡力踼場好波,唔係鳩踼。

但香港人就送他們六位數字票房,該他們血本無歸,之後賣碟cheap 到 $29 隻都仲一疊放係鋪,真係於心何忍。

於是我就係2014同2015年上映過,而我又睇過(有一套未睇過)既港產片入面,執幾套出黎推介下,大家可以搵黎睇下,唔使一見到係港片就急不及待咁「爛片」「垃圾」咁標籤上去。

同時地,亦希望大家入場支持一下港產片。

 

唯美映像類

有D香港電影,導演都砌到D鏡頭好靚,將電影當係一件藝術品咁去搞。其實入場睇既時候你應該當自己係睇緊100分鐘會郁既油畫,好好咁欣賞一下導演既美學。

但好多時呢D導演講故事能力就相對較弱,大家入場時如果係抱住睇精密劇情、起承轉合、估你唔到既期望入去睇,好多時根本唔會留意到導演其實砌緊個畫面比你睇,最後就係Facebook掉低一句:

「都唔知佢做緊乜?」

「垃圾,爛片,呃左我幾十蚊!」

「個故仔一D都唔 make sense 囉!」

咁,公平咩?

《救火英雄》郭子健

clip_image002

其實郭子健算係比較拎到個平衡點,佢D故仔同畫面配合得幾好。你留心睇就會知道佢好鐘意黑白灰三隻色加D粉係度飄飄下同埋大光白燈做一種蒼桑既感覺(野良犬時已經係咁)。

呢種叫風格,即係話,有人比段咁上下既野你睇,你就會懷疑:「咦?係咪郭子健整嫁?」

幾十蚊,入場睇下幾個型佬同呢種風格都回到本啦。

《惡戰》黃精甫

clip_image004

講到黃精甫,就不得不提萬人齊屌既名作《阿嫂》。《阿嫂》基本上就係完全放棄劇情同理性,極力追求用畫面表達導演意思既電影。

而《惡戰》,就醒左;佢繼續樂此不疲地玩佢既畫面設計,故事?最簡單就好了。人物性格?最簡單就好了。

於是,如果你入場唔係專心地睇佢幅動態油畫,其實你出黎一定唔會開心。

但係,你入藝術館睇雕塑睇油畫都要比入場費啦,幾十蚊睇90分鐘打鬥系列動態油畫其實有咩問題?

最大問題係,如果佢票房再係咁落去,呢個世界上就唔會再有咁靚既港產動態油畫了。

有時我唔明,點解有D人睇羅拔洛迪古斯可以接受D故仔唔清唔楚,又或者犯駁連連,齋睇佢既畫面美學,但睇港產片時就要求套套都要有齊起承轉合,合情合理呢?

 

無人問津類

有D香港電影成本低得可憐,場景少,道具少,燈光少,宣傳少,乜都得最低消費。最慘最慘最慘係,連場次都少。

星期四第一日上畫,已經得早場同下晝場,放工先想睇?No Way!一個星期後,只剩早場,再一個星期後,無晒。根本就係想睇都睇唔到。

呢類型既電影好多時連「爛片」「垃圾」既評語都得唔到,因為根本就無人睇過。

《一個複雜故事》周冠威

clip_image006

呢套戲我係電影節時睇既,電影節你知好難買飛,但係呢套戲入場時大約只有半個院有人坐。完場後導演黎左交流,我問佢:「你有無諗過呢套戲回到本?」佢答我:「無,無可能。」

但呢套戲故事相當唔錯(奕舒原作),劇本有因應時代改變,選角認真,節奏亦操控得唔錯。當然,就唔會有D咩飛機大炮大場面,全部都係文戲。

幾十蚊,你當聽一個故仔,睇下演員既功力,都已經值啦。

《末日派對》何康

clip_image008

我好記得好記得,呢套戲我係特登射波去德福睇早場既。果時套戲上左未夠兩個禮拜,打開個App,全港一日得返五場。係五場!

然後,我知道謝安琪拍戲係趕客,我知道黃貫中係木口木面唔係太識做戲,我知道佢D特技場面唔夠錢做,只能比到呢D野我。

但我睇完都好開心,因為,佢係拍緊香港人,即係我同你既生活。

然後我好傷心,因為我知道,以咁樣既票房成績,同類型既戲再有老闆投資係天荒夜譚。

所以你話你果幾十蚊,對香港電影係幾咁重要。

《N+N》賴恩慈

clip_image010

呢一套係另一套非常神奇既作品,因為佢上映既方式係:「爆一場,加一場」

即係話,只要佢今場唔爆,佢就唔會有下一場。呢件事其實係電影發行史入面算唔算係前無古人?我唔知道,亦無乜心機去查,但肯定係非常罕見。

電影本身其實一般,但電影所承載既事實,或者用「歷史」比較準確一D,則係非常震撼既。

幾十蚊,你就有份參與一件歷史,你話抵唔抵?

其實呢類型既電影,每一個觀眾對佢地黎講都好重要,你買一張飛,就出一分力,幫手係市場上面留住同類型既電影。

 

紀綠片類

係香港,做紀錄片導演,注定係悲慘既。

明明係紀錄緊大家身邊發生既事,明明好多都好好睇。但係係香港,佢地擁有既場次往往比上面「無人問津類」既電影更少。

香港電影金像獎連「最佳紀綠片」呢個獎都無。好似香港從來都無紀綠片一樣。

但其實唔係嫁,香港有好多人拍緊紀錄片,只係有無得上,又或者上左你睇唔睇到既問題。

《未夠秤》Matthew Torne

clip_image012

追蹤黃之鋒同馬仔(馬雲祺)既經歷,同時亦見證住前一兩年青年參與抗爭既道路,非常值得一睇。

《爭氣》楊紫燁

clip_image014

令人非常感動既真人真事,作為紀綠片能真正上映非常難得。

《河上變村》曾翠珊

clip_image016

另一套只有係電影節先睇到既戲,角度好特別,有好多唔講你唔知既事。

《青洲山上》張經緯

clip_image018

我,夾唔到時間去睇。好後悔。亦係呢個LIST唯一一套我無睇過既戲。

紀錄片能唔能夠上到大銀幕,其實好多時係睇成績,大家投資幾十蚊,就令到下一套紀綠片能夠上映既機會增加一點,希望大家可以支持。

 

援交問題類

呢兩年,有好多套講援交既電影,但無一套真係非常賣座。究竟大家係咪真係對援交問題咁有興趣呢?定係老闆們對於呢個問題太有興趣,所以先開到咁多套呢?

同類型題材既戲太多,觀眾就會厭,會係未入場,未睇套戲之前就話:「下?又係果D呀?」

最後,唔入場。

但實際上,呢堆戲探討既角度都好唔同,導演手法,鏡頭處理,故事走向,通通都各有味道。

其實,呢D就係香港人精神,老闆叫我地都做同一樣野,但我地就要係呢個前提下做出自己既風格。

《微交少女》翁子光

《販賣愛》朱家宏

《雛妓》邱禮濤

《同班同學》陸以心

你無睇錯,2014-2015,兩年,四套講援交既戲!

clip_image020

如果問我,我會話我最鐘意《微交少女》,故事夠黑暗,夠直接。唯一問題係用祼替,你用唔緊要,我都覺得未必個個演員接受到要脫,但係條女日日周圍講話果個唔係佢,就搞到套戲扣左分,然後導演完全係受害者。

比幾十蚊,就有得睇血淋淋,援交黑暗既一面,算係好抵。

另外,翁子光拎住九個金馬獎提名既《踏血尋梅》就快上啦,大家真係要支持一下。

clip_image022

《雛妓》呢,由阿SA一句:「我有比你屌嫁!」成功彈出。但實際上呢套探討既問題係女性用自己身體養活自己,定係男性養女性再有體液交換呢個問題。我覺得幾值得思考下。

當然,好多人比幾十蚊入去聽完蔡卓妍屌人就已經滿足晒。

clip_image024

《同班同學》係一套無諗過比男人睇得明既戲,佢完全無打算解釋比男人聽女仔係點諗野既,而且戲入面,所有男角都係樣板,只係女生心入面想像出黎既男人形象,而唔係真正既男人。

但呢套係真刀真槍,我覺得同彭浩翔將粗口帶返入香港電影一樣,係打破「裸體就是色情」既一個里程碑黎。

clip_image026

至於《販賣愛》,係一個美好過頭既故仔,導演功力亦一般,唔係好駕馭到個故事既感覺。算係呢四套入面比較唔好既一套。

但係,佢既努力,佢既勇氣,我都唔覺我果幾十蚊係嘥左。

 

「有話題,票房唔錯」類

下面介紹呢幾套票房算係唔錯,而且算係幾好睇既香港電影。當然佢地各自有各自既缺點,但我覺得,好值得支持。

《狂舞派》黃修平

《浮華宴》黃百鳴、邱禮濤

《衝鋒車》劉浩良

《全力扣殺》郭子健、黃智亨

《王家欣》劉偉恆

幾套都幾出名,你睇左三千字黎到呢度你都無理由未聽過。但我唯一想講既係《浮華宴》,呢套係意想不到咁好睇,如果你未睇過,真係要快D搵返黎睇。

clip_image028

 

電影欣賞方法

一套電影,佢做得好同唔好,同你睇完之後鐘唔鐘意,其實,係完全分開既。

即係睇完一套戲,係可以有四個狀態:

做得好

做得唔好

你好鐘意

1做得好好,然後你好鐘意

3做得唔好,然後你好鐘意

你唔鐘意

2做得好好,然後你唔鐘意

4做得唔好,然後你唔鐘意

然後其實做得好唔好,又或者你鐘唔鐘意,係一個程度既問題,即係話由極差到極好可以比1-100分,由極唔鐘意到極鐘意你又可以比1-100分。

咁最後,一套戲既評分其實係有一萬種可能。

而今時今日,大家都有自己Facebook,大家都係影評人,但最後你評套戲時都係得「好睇」同「爛片」兩種評語。

而又有好多人會因為朋友一句「好睇」而入場,又有更多人因為某人一句「爛片」而唔入場。

咁樣對電影製作人其實好唔公平,因為佢地最後得到既成績表入面,真正重要既只有一個分數,果個分數叫票房。

而呢個分數,係你同我都有份負責打既。

所以所謂支持香港電影,同支持香港足球一樣,你唔可以因為佢輸波唔支持,你唔可以因為佢跑得唔夠快而唔支持,因為你果幾十蚊,對於香港電影既發展,其實非常重要。