星期一, 7月 28, 2014

大型災變港人求生手冊 - 應對的態度 - 死去的人比活著的人幸福

應對的態度

20140207014651953

在決定我們要怎樣去準備應對各種大型災變之前,我們首先要確定自己的心態:究竟要不惜一切保住性命,還是隨遇而安,生死各安天命,甚至立志要去拯救世人?當你看各種災難電影的時候,主角們和所有出現的角色他們都只會有一個想法:「活下來」,盡可能地活到電影出字幕的一刻,除此之外,他們就甚麼也不用理會了。這不是很奇怪嗎?整個地球被怪獸/病毒這等級的災變襲擊,但只要能堅持到電影結局,所有問題都解決了,生活回復「正常」,大家繼續思考要在哪裡才找得到肯和你捱麥記的女生,或是想想今晚電視會播哪一套劇集。但事實是殘酷的,當發生災變後,活下來的人們將要面對一個完全不同的人生,不再會有麥記,不再會有雞汁,生活永遠也不會回到發生災變前的「正常」。你有信心去面對這樣的生活嗎?你會以怎樣的態度去應對這新生活?以下我們會由最消極到最積極去討論一下對於大形災變,我們要用怎樣的心態去迎接他。

 

死去的人比活著的人幸福

看過第二章所說的災變例子後,很容易可以得出一個結論:「活下來的人遠比死去的人痛苦」。災變發生後,每週七日,每日24小時,人們可以做的事就只有一個:「讓自己繼續生存」。這不是誇張的講法,因為地球上已經再沒有專門為你耕作的農夫了,所以你必需要自己找食物;因為城市中已經沒有任何在營業的店舖了,所以你必需要自己製造禦寒衣物;因為打開水龍頭已經沒有自來水了,所以你必需要自己去找水源;因為這地方已經沒有維持治安的警察了,所以你必需要自己守護自己的財產免被搶奪。地球上再沒有任何娛樂場所,也沒有任何文化傳承,剩下來的,只有生存。你和野獸的分別,就只剩下會制作和使用工具這一點了。

或許你以為這些都是會很快恢復過來的,一年?兩年?災變如2005年南亞海嘯,又或是1991年皮勒圖博火山爆發,他們有著其他國家的救援,有著不同善心人士的捐獻,但重建的過程也要一年半載。如果是全球性大型核戰又或是地殼變動的話,沒有任何人會來救你,全球各國都自身難保時,大家連能不能生存下去都成問題的時候,根本沒人有閒時去作重建。人們的生活會回到穴居人的水平,每天早上外出覓食,晚上睡覺繁殖;要由這樣的生活開始,回復到有《復仇者聯盟》可以看的話,時間至少需要幾十年吧。

要活下去的話,就至少要受幾年的苦。不少人會想:「倒不如在災變時死掉來得乾手淨腳吧!」;在災變時直接被殺還好,如果幸運地活下來的話,又有多少人會付諸行動,結束自己的生命以圖個「乾手淨腳」呢?

如果發生小行星撞擊時,你剛好在前往歐洲的飛機上,但飛機因為氣流失控被逼降落在烏茲別克荒蕪的平原上,繫好安全帶的你毫髮無傷。從無線電中得知小行星擊中太平洋中心,過百米的海嘯正席捲太平洋沿岸,剛好你有看過本手冊,你知道除了海嘯外,蒸發的海水會做成長達幾年的嚴冬。你環顧四周,一望無際,而你手上只有一本《龍紋身的女孩》和剛才用餐時留著的麵包,你趁你手機還有電的時候打開了GPS,最接近你的公路在過百公里外,Google Satellite上除了一片無盡的黃色就甚麼都沒有了。你知道你是絕望的,生存下去的機會很渺茫,即使生存下去,等著你的,只有無盡的飢寒交迫。但是,你有勇氣在這一刻結束你的生命嗎?

螢幕截圖 2014-07-28 23.34.52

所謂帶著「死去的人比活著的人幸福」這心態去迎接災變,簡單來說,就是要具備這種勇氣,這種覺悟,還有這方面的知識(你至少要知道人怎樣才會死去、要知道各種自殺方法所需的時間)。坊間也有不少《完全自殺手冊》之類的書籍可以幫助大家,但由於這本是《求生手冊》所以這方面就不談太多了。但要留意的是,在結束生命前一定要先想好自己屍體的處理方法,因為沒有處理的屍體會讓細菌滋生,對其他人造成不必要的困擾。最理想的處理方法是找一些想生存下去的人,告訴他們你不想活下去,讓他們把你的屍體作出適當的處理,在日後成為延續他人生命的糧食,這樣最有意義。

星期日, 7月 27, 2014

大型災變港人求生手冊 - 災變的種類 - 太陽風暴

我們以小行星撞擊來開始這一章,就讓我們以另一種從外太空來的威脅來結束這一章吧。我們每天都看見那溫暖的太陽,在幼兒園的時候,我們畫圖畫總是首先在畫紙的上方畫一個大大的圓形,然後加上幾條直線。太陽對我們有恩澤這件事早在你懂性之前就已經根深柢固,科學一點說,地球上絕大部份能量的源頭,也是來自太陽,植物通過光合作用把太陽能變成澱粉或纖維,動物透過食用植物或其他動物來獲取能量,這條食物鍊中99%以上的源頭都是太陽。但你又有沒有想過,太陽可以給予我們這一切,她也有權回收這一切呢?

On August 31, 2012 a long filament of solar material that had been hovering in the sun's atmosphere, the corona, erupted out into space at 4:36 p.m. EDT. The coronal mass ejection, or CME, traveled at over 900 miles per second. The CME did not travel directly toward Earth, but did connect with Earth's magnetic environment, or magnetosphere, with a glancing blow. causing aurora to appear on the night of Monday, September 3.<br />

太陽的壽命大約有一百億年,現在她大約是五十億歲,所以或許你一點都不擔心,因為50億年對於人類來說實在太長遠了,如果將太陽出現到現在那五十億年濃縮為一場90分鐘的足球比賽,人類是在球證鳴笛完場前0.03秒才出現的生物,當你連面前的一秒都搞不清能不能捱過的時候,去想90分鐘後發生的事絕對是多餘的。既然不需要擔心太陽死亡,我們要怕的是甚麼呢?

答案是即便太陽對我們耍一點小脾氣,人類文明就要垮掉了。太陽是一個一直在燃燒的超大火球,上面一直發生著形形色色的大爆炸,噴吐著攝氏6000度以上的火焰。當有些低溫的地區出現時,在地球上看太陽的表面會出現一些小黑點,這些小黑點叫做太陽黑子。太陽黑子附近通常都正在發生著太陽耀班的爆發,你想像成可以把整個地球炸掉的大爆炸在黑子附近發生就好了。耀班有著比較大的磁場,那些磁場呈拱形環狀的在太陽表面跳躍,氣溫高達一千萬至四千萬度。或許你會問,這些關你甚麼事呢?實際上,這個過程會從太陽中向太空發射大量的帶電粒子,而這些粒子塵做成的風暴(稱作太陽風暴),如果正面擊中地球,後果會不堪切想。

1-376

事實上,地球在1859年就被強烈的太陽風暴擊中過一次。平日太陽散發的小量帶電粒子會和北極附近的磁場形成若干扭曲,令帶電粒子能量釋放,發出光芒,這個現象我們稱做極光。在1859年,世界各地都看到天上閃耀著極光,這種反常的天氣現象被大量的記綠下來,證實當年有強烈的太陽風暴正面擊中地球。這些帶電的粒子令到當時的電報系統全面失靈,有些電報機樓和電報塔著火燃燒,也有一些沒插電源的電報機自己突然運作起來,有些電報員也因此觸電,指南針也一度無法正常運作。

或許你仍然會問,這些關你甚麼事呢?當年在地球上我們只擁有電報系統這一種用大型帶電網絡的東西,所以太陽風暴感覺就像全球性的幻彩耀香江罷了。

但現在呢?我們有多少東西是用大型帶電網絡的?答案是我們差不多所有東西都是用電流推動的,而交流電的供應就正正是一個超大型的帶電網絡,遍佈全球每一個角落。

如果更強的太陽風暴正面吹襲地球,首先,我們會再一次看見那美麗的極光,然後,那些帶電粒子會讓所有用電的東西失靈,你想到的可能是電視機或者你手上的iPhone,但最大問題不是這些,而是由發電廠把電傳送到每一個插頭中途的變電站,為了減低傳輸時的能量流失,電力會以高壓電的形式傳送,再從變電站中降低電壓,大量的帶電粒子會讓高壓電變得異常,如果變電站像1859年時的電報機一樣,被燒毀又或是過度使用而故障,那供電將會立即停止,而這種情況將會全球性地發生,無一幸免。你或許會說只要把他修好就OK啦,但維修這些變電站需要專業人員和特殊的零件,而這方面的專業人員平時可能綽綽有餘,但當全球一起出現問題時,他們根本不可能有足夠的人手在短時間內把變電站修復,零件方面的情況也一樣,備用的零件根本不可能足夠,生產也來不及。更糟的是,那些專業人員和零件根本無法在短時間內到達壞了的變電站,因為負責控制交通的系統是用電力推動的,全世界所有交通燈會在同一時間失靈,在那一刻全世界會發生數以億計的發生交通意外,路面交通全面癱瘓,車龍一直延伸到每一條高速公路上,可以運用的運輸方法只剩人力、水路和少數完全沒有鋪設電氣化的鐵路。除了變電站外,發電廠會因為太陽風暴而停止運作,要把完全停下了的發電廠重新啟動需要超大量的能量,而癱瘓的交通又怎麼可以傳來如此大量的能量源(石油、鈾、煤等等)呢?結論是需要燃料的發電廠全都在短期內不能恢復過來。

64C190F8DAC3ACA00458376846372F0A

粗略估計最少要一年或更多的時間供電才能回復到令人滿意的程度,在停電的這一年裡,人們要怎樣才可以活過來呢?外國我不知道,但香港人呢,根本上是死定了,首先是食物和食水的問題,因為香港的供水全都倚靠電水泵把水泵到儲水庫又或是大廈天台的水箱去的,所以所有自來水會停止供應。食物會因為交通癱瘓而無法運來香港,用以生存的基本資源異常地缺乏,人們會開始為了爭奪食物和食水而武力相向。人們被打死、渴死又或是慢慢餓死,死亡的人會帶來疾病,而疾病又會帶來更多死亡的人。這一方面和其他災變的情況類似,只是其他災變大都會先殺死大部份的人,再讓活下來的人大亂鬥,而太陽風暴則會讓100%的人生存下來,然後一起玩這個自相殘殺的生存遊戲,某程度上,這比在維港中間丟下一個中子彈還要殘酷。

而聽說2013年和2014年這兩年會是太陽耀班的活躍時期,這個周期每十一年一次,說不準明天我們就可以在頭頂上看見極光了。香港人,你準備好了嗎?

星期六, 7月 12, 2014

世界盃決賽賽前分析

今屆終於黎到決賽,德國對阿根庭。

先講德國
flag-germany-M

上一篇我話分組賽時果隊德國非常女人型。咁係十六強既時候佢地終於償到苦果,比寂寂無名既阿爾及利亞逼到差D翻船,靠加時中既兩個入球險勝2:1,該場德國隊既女人型表露無遺。踼到好似驚阿爾及利亞班球員痛咁樣。如果唔係門將紐亞多番出擊解圍,可能德國已經歷史性16強出局了。

該場德國作出左21次攔截,有7次成功,但只有11次犯規。簡單黎講就好似同你跳TANGO咁,你前我前,你後我後,攔唔到?咪唔攔LAW,一D男人味都無。

GERTackleFoul

十六強既德國隊真係慘不忍睹。我睇到,你睇到,德國既專業團隊都睇到!

所以到左八強,佢地變陣,終於出返個正職防中,放返阿林生Lahm落去打閘,同埋,出上個年代既真男人Klose打箭頭。

img8835
「屌你老母啦,無乜撚野鋒,正正經經踼啦!」比亞荷夫一邊大巴咁車落路維度,一路講(設計對白)。
路維斜跪係地上,單手摸住自己塊面:「連我爸爸都無打過我。好啦,轉陣啦。」

轉左陣之後,成隊波醒晒,有返男兒氣慨。

GERTackleFoulFRA

12次攔截入面,成功攔截2次,犯規18次。你法國仔好波,我攔你唔到,唔緊要,我犯規都唔會比你去。呢D咁既鬥志先似返一隊正常既足球隊。記住足球唔係羽毛球,唔係排球,身體接觸、踫撞、剷截、犯規呢d唔係禁忌,而係比賽既常態。這是一場戰爭,和理非非係行唔通既。

死球入球之後,德國全力阻止法國隊做最擅長既事。咩事?咪就係人少打人少。防止人少打人少既最佳方法,就係後防無論何時,都放好多人係度。

守到完場(根本法國對住多人就唔識攻),幼齒法國隊可以去加勒比海渡假,而德國去到四強可以對巴西。

德國對巴西呢場波,將會永遠記入史冊入面(廢話,邊場唔會?)。大家都知結果發生左咩事,但我要同你講既,係發生呢D事原因。

坊間提出既原因主要有幾個,等我逐個駁:

  1. 假波論
    要有假波,必先要有巨大既經濟動機。
    但巴西對德國呢場波呢?完全無造假既動機。全世界所有賭博網站、莊家既賠率都係一半一半,分別只係有D食水深D,有D無咁深。
    即係話,買德國既人同買巴西既人係一半一半,又即係話,莊家們只需要企定定,乜都唔做,就會有大錢搵。咁佢地為乜要做假?
    要做假,首先要收購買巴西的投注,然後出售買德國既投注,做到你手頭上買巴西既錢多過買德國既。咁,邊個賣比你?無啦啦好地地我兩邊盤一半一半穩賺,我為乜要賣比你?我又為乜要買你手上既德國盤?第一步已經唔WORK。
    第二步,你要收買巴西球員,佢地個個週薪以萬歐羅計,你要比幾多百萬先收買到佢地?你要點先回到本?你要點先有肉食?根本就風險高,利潤低。
    風險高,利潤低。除左白痴之外,邊個會做?白痴既會唔會做到外圍莊家?
    所有話呢場係假波既人,其實好多事情只要稍為用個腦諗下,就會知道係合理定唔合理。
  2. 尼瑪、施華缺陣論
    我好簡單講一句,你睇返頭5球,有邊一球係你換返呢兩個人入場你就唔使輸?佢地咩人?IRONMAN?定美少女戰士?定努力超人?根本輸波唔係換一兩個球員就無事。
    實際上,你想像一下,兩隊即使原班人馬,再踼一場,德國再贏一次7:1既機會係微乎其微的。
  3. 廢特論 (今屆世界盃苦主第一名)
    全世界都話費特廢,累死巴西。又係果句,我比你古今中外任揀一個球員代替費特,比利好未?華華好未?薜高好未?羅馬利奧好未?有邊一個可以阻止係6分鐘連失4球既巴西輸波?又或者有邊一個可以追返呢五球?有無保證?
    係平均入球遠低於3既現代足球入面,幾多場波先有一場6:5反勝?咩人可以做到?
    我只係諗到一個,果個日本仔黎,仲踼一場波踼幾年,佢有個譯錯左既中文名,叫戴志偉。
    如果除左漫畫人物無人幫到巴西,咁我覺得怪費特係無補於事LAW。
    而且史高拉利既戰術,由2004年既葡萄牙開始,佢比個單箭頭既指令就係:「乖啦,你為左XX犠牲下啦,見到波黎就行開,讓條路比XX扭入黎啦。」(XX可以填C朗/尼瑪)
    咁其實佢做足本份,因為教練既指示就係要佢做一個廢柴前鋒丫嘛。
    2004時有個苦主要Pauleta,到左2014,苦主叫做Fred。

咁實際上,巴西輸乜/德國贏乜?
我唔答你,我等斷蟹答你!

LuckyMan

而呢個人,佢叫馬些路,就係果6分鐘,佢黑到無晒朋友,黑走左成隊巴西隊。
正常一個人,佢犯錯係平均地犯既,唔會聚埋一齊犯。但果6分鐘入面,馬些路連續犯錯,個個致命。真係無人幫到佢。
http://www.businessinsider.com.au/brazil-germany-goals-2014-7
上面條Link 講左巴西果六分鐘點樣失4球。
你留意下,佢第一球,包越位。
第二球,係佢果邊出波。
第四球,佢選擇企係龍門後面而唔選擇Mark人。

咁抵輸啦,又係果句,兩隊原班人馬,再踼一場,結果一定唔係咁慘烈LAW。

實際上德國呢場14個射門,7個入波。等如你去澳門見到一枱百家樂開14鋪有7鋪和,機會率呢D野,要還嫁,無一隊現實既足球隊可以Keep到場場入球率係50%,正如無一枱百家樂可以Keep到和既機會率係50%一樣。

講咁多野,其實都係想講德國並沒有大家想像得咁神。今屆佢地只有一場試過逆境,就係對加納果場,實際上佢地爭D輸埋。所以如果比阿根庭入波先,可能佢地成班好似法國咁不知所惜,老鼠拉龜嫁。


到阿根庭

flag-argentina-M

之前我話阿根庭各自為政,唔知想點。而家佢入左決賽,我對呢隊波唯一既評語係:「悶」。
唔係話無/少波入就悶,而係佢先天性既打法令佢好悶。

悶既原因有兩個,第一個,係一早就出左局既西班牙。
點解咁講?今屆世界盃開始前,所有既強隊,佢地既假想敵只有一個:西班牙。
對付西班牙既方法,其實唔多,其中一個最多人採用既,就係密集防守,我放八個人係禁區頂,等你Tiki-Taka 猜到夠,總之我死球或者突擊入一球就夠贏了。
咁開波前得三個禮拜集訓,可以練既戰術其實好有限,於是每一隊強隊,都集中練密集防守,因為大家都覺得,要贏冠軍,先要贏西班牙,阿根庭就係其中一隊,而荷蘭、比利時、巴西、法國等等強隊,其實佢地戰術設計既重點,都係在於如何對付西班牙。

但事實係西班牙兩下就收左皮,結果強隊既對手們都無踼Tiki-Taka,但又無練過其他戰術,咁既大賽踼一D自己無密集訓練既陣式其實同自殺無分別,咁點算?咪唯有兩隊一齊踼密集防守。
結果咪兩隊都八個人係禁區頂,剩返兩個人攻,你話會點?

呢個係阿根庭對比利時既真正陣式,係FIFA根據每個人最多出現既位置畫出黎既。
RealFormationArg
4個人一排,排兩排係禁區前面,兩個人攻。
呢招就係典型用黎對西班牙既戰術。咁比利時唔係西班牙,佢根本唔知點樣可以攻破呢兩架大巴。最後?咪「悶」LAW。

第二個原因,係美斯每一場,記住,係每一場,平均跑動距離都比自己隊友少一大截。

ArgRunDistance
數據連結

當你有一個人唔肯跑既時候,其他人自然要跑返佢果份黎避免輸波,情況同打少個人一樣。咁打少一個會點?要守,要死守,要不惜氣力咁死守;攻擊?等對面出錯咪求其攻下,或者死球LAW。最後場波會好悶。

基本上阿根庭三場淘汰賽都係咁,好悶。係呀,美斯係行後左,「打算」做一個進攻中場。但係佢奉行以下幾點:
攻?唔係我帶波,我唔跑嫁;
守?我球王黎嫁,唔係要防守下嘛;
有波到腳既時候,要先扭幾下;
如果有得射就即刻射,唔係好夠位都射左先;
無計啦,要傳波啦,就一定要傳Killer Pass,向前直線;
直至對方踼跌你/搶到波為止。

呢D野,我知,有睇過呢幾場既人知,德國/荷蘭既專業教練團隊都知。

所以你會見到美斯對荷蘭成場行行企企,唔知做乜,快攻就拿維斯同希古恩兩個跑,佢係中圈等。一拎到波就行上面果幾行Program,防守早有準備,Easy Job。

即使係咁,仍然有好多人覺得佢果場打得好好,話佢不嬲都係咁,話足球唔係好似蠻牛咁衝黎衝去。OK,我笑而不語,即係你鐘意一個人,係放個屁都香D啦,丫唔係,佢點會放屁呢?佢球王黎家嘛,球王係唔會放屁嫁。

我唔知點解阿根庭要比美斯咁做。但如果我係教練,會開拖鬧佢,大佬,因為你一個人,令到成隊都打得勁辛苦。有D突擊明明係有機會變成入波,但當ROJO落到底線,你美斯大爺仲係中圈度嘆緊奶茶,前面得剛剛同ROJO打左個撞牆既Lavezzi同埋入左禁區面對住三個後衛既Higuain。

咁點贏?

OK,同心協力守到120分鐘然後十二碼晉級law。

呢個亦係全世界都覺得你贏唔到德國既原因。

當然,萬一德國有個傻仔叫保定一野剷落Lavezzi度,球證比封利是佢;又或者萬一開波無耐,美斯大爺入一球罰球;咁咪可以同心協力守到完場LAW。

從來無歐洲球隊可以係美洲大陸捧盃,而上一次阿根庭捧盃,就係係墨西哥對住西德隊,當時阿根庭既10號,叫Diego,佢係八強用手入左一球,然後一次扭八個人再入一球;係四強時亦都射入比利時兩球。今年,呢個叫Lionel既10號,能唔能夠用行行企企黎放自己上神台呢?

DiegoMaradonaWC86_2456940

我都係果句,如果你咁打都拎到冠軍,做到球王,我唯有認你係球王。有時D野無得駁,佢拎得既冠軍都拎晒,仲點駁?足球,本來就是勝者為王既遊戲。


係講完兩隊個別既分析之後,我地黎睇下兩隊既對戰成績:

全部對賽:
德國7勝,阿根庭9勝,4和

世界盃決賽周:
德國3勝,阿根庭1勝,2和

世界盃決賽:
德國1勝,阿根庭1勝

比賽日期 對賽 比數 賽事性質
08 Jun 1958 West Germany v Argentina 3-1 FIFA World Cup
16 Jul 1966    Argentina v Germany    0-0 FIFA World Cup
14 Feb 1973 West Germany v Argentina 2-3 Friendly
05 Jun 1977 Argentina v West Germany 1-3 Friendly
12 Sep 1979 West Germany v Argentina 2-1 Friendly
01 Jan 1981 Argentina v West Germany 2-1 Gold Cup
24 Mar 1982 Argentina v West Germany 1-1 Friendly
12 Sep 1984 West Germany v Argentina 1-3 Friendly
29 Jun 1986 Argentina v West Germany 3-2 FIFA World Cup
16 Dec 1987 Argentina v West Germany 1-0 Friendly
02 Apr 1988 West Germany v Argentina 1-0 Four Nations Tournament
08 Jul 1990 West Germany v Argentina 1-0 FIFA World Cup
15 Dec 1993 Argentina v Germany 2-1 Friendly
17 Apr 2002 Germany v Argentina 0-1 Friendly
09 Feb 2005 Germany v Argentina    2-2 Friendly
21 Jun 2005 Germany v Argentina 2-2 FIFA Confederations Cup
30 Jun 2006 Germany v Argentina    1-1(4-2) FIFA World Cup
03 Mar 2010 Germany v Argentina    0-1 Friendly
03 Jul 2010 Argentina v Germany    0-4 FIFA World Cup
15 Aug 2012 Germany v Argentina 1-3 Friendly

簡單結論就係歷史比出黎既答案就係係世界盃,德國表現好D;係最重要既決賽,佢地平手;而計埋友誼賽,洲際盃呀一堆的話,就係阿根庭好D。
或者你會第一時間駁我,果D1958年就唔好提啦,咸豐年既野。好啦,咁我唔講,講返近呢十二年既賽事,點解係十二年?因為最少仲有一個叫Klose既人係十二年前果場有踼既,咁有參考價值啦掛。
近十二年兩對既對賽成績係:德國1勝,阿根庭3勝,3和。
留意,十二碼晉級,係計和波;係未有十二碼之前,世界盃淘汰階段打和,係要重賽的;之後1968歐洲國家盃甚至試過用擲毫黎決定邊隊晉級;十二碼,只係一樣用黎取代擲毫既東西,贏擲毫/十二碼,唔算贏左Law。
講返近十二年既對賽戰績,就可以一野推翻晒果D話德國對阿根庭係格食格既純感覺發言。如果1勝3和3負係格食格,咁近年香港社運界都算食住香港政府嫁啦。
實情係咩?就係同頭先睇晒咁多年一樣,友誼賽,阿根庭佔優,世界盃,德國佔優。
不過國家隊有時真係好難用戰績去分析,因為兩隊對賽太少。如果係比較皇馬同巴塞,佢地一年最少對2次,分分鐘可以對6次,睇4年已經約莫有20場波既往績去睇。但國家隊你睇呢兩隊,由盤古初開到而家都只係對左20次。
1993-2002中間9年完全無對踫過,點比較呀。

咁究竟係德國會成為第一隊係美洲大陸捧盃既歐洲球隊,定係美斯捧盃順利加冕成為球王呢?

我成日都咁講,我分析唔係為左話比你知邊隊會贏,我分析既目的係話比你知足球係有幾咁難預測,所以?好好享受四年先有一次既世界盃決賽啦,唔好買咁大呀。

星期二, 7月 01, 2014

世界盃十六強賽前分析 - 比利時 vs 美國

比利時
flag-belgium-M


其實比利時呢,係一隊弱化版前場,同強化版後場既阿根庭。

點解咁講呢?先講後場,佢地三場只係失左一球,而且仲有45分鐘係十人應戰。而且失果球,仲要係十二碼黎。有邊隊可以同佢比?無錯,哥斯達黎加,哥斯達黎加都係3場分組賽輸一球,然後失果球都係十二碼黎。

即係話,呢兩隊都無係分組賽失過生球。

而比利時最得人驚既就係,佢三場分組賽跑動距離都是輸的。即係話,佢地係比人打少零點幾個人,仲有45分鐘係打少一點幾個人,係擁有人稱「罩門」既中堅雲拜頓既情況下,三場失一球。

Unbelivable!

原來人稱「罩門」既中堅雲拜頓,今屆好似頭頂有盞燈咁,打得勁好。幾年前,我根本唔敢想像將雲拜頓同意大利正選中堅放埋比較,可以得出咁勢均力敵既數字,但今年,佢真係做到。
VanBuyten

當然唔失波永遠都唔會係一個人既功勞,Kompany同小爆炸頭維素既功勞亦都不少,整條防線配合得相當好,好少出錯。

講返進攻,所謂黃金一代既比利時,前場有2014年PFA年度最佳青年球員Hazard,有小魔獸Lukaku,有爆炸頭Fellaini,仲有美斯美頓斯。令人地期望佢地作出精采既前場配合,大數對手。

最後戰果係,三煲魚生粥,2:1,1:0,1:0,我估好多人都幾失望。

點解會咁呢?
問題其實同阿根庭一樣,班友覺得自己好勁,想做英雄。

咁就死啦,人地美斯,阿古路,希古恩,拿維斯,有邊個唔係一等一既進攻球員,無論身價,入球數據,都係無線結他,無得彈。但你地堆名呢?唔係唔勁,但就唔會有七個足球先生或者六千萬歐既身價Law。

咁你又學人玩英雄主義,大佬,人地Iron Man、Thor,你得Eagle Eyes同Dare Devil,感覺就爭好遠。

又睇Pass Distritbution,黃色highlight係互傳次數。
FW
喂,大佬,交波呀!唔好咁多空格得唔得?

所以人地哥倫比亞又係黃金一代,你又係黃金一代,人地4場入11球。你三煲魚生粥,其實唔係無原因既。

對住美國既體力型打法,佢地一定勢凶夾狼咁撲埋黎,你唔傳波,想做英雄,但你有無時間咁做呢?會唔會你一拎左個波就已經有兩個Captain America飛個盾埋黎呢?

比利時,如果你真係想入四強,做黑馬,咁你一定要班大帝明白,究竟係隊波重要D,定係佢自己重要D。否則萬一下一場雲拜頓一次極慢轉身,對面單刀入左一球然後守到尾,就要同你既黃金一代講再見了。


美國
flag-usa-M


美國好難寫,因為佢同德國一樣,第三場分組賽一D參考價值都無。但同德國唔同既係,德國我之前可以睇外圍賽,仲有兩年前歐洲國家盃,呢幾年佢都只係加加減減,無乜大幅度改革。但美國呢?我唔知佢搞緊咩,我有既,就只有頭兩輪既分組賽。

咁都要寫嫁,唔通掉低唔理佢咩。

首先當然係睇我最鍾意睇既跑動距離先啦,係呢兩場波入面,毫無意外,美國隊既跑動距離全贏。
rundistance

佢地真係好似食左過期西班牙烏蠅咁,係咁跑係咁跑。你唔知跑動距離代表乜?大佬,我真係已經講到口水都乾,跑動距離如果多對方10%的話,其實就同打多個一樣啦,明冇?如果對方跟住你跑,而佢又無跑開咁多,跑兩跑自然無氣,無氣你尾段就有優勢啦。

成日講跑動距離好悶,咁我講下一個好怪既現象,通常FIFA選最佳球員,一定係有入波既優先的,如果選左龍門做最佳球員,通常個龍門都係無失波,令到球隊0:0和或者1:0贏,但係美國對葡萄牙既比賽入面,2:2,點解唔係射入遠射既鍾斯,唔係追平既丹普斯,而係龍門侯活做最佳球員?

會唔會係侯活真係好好好好好神勇?我地睇下佢,總共救左7個波!而今屆暫時最佳門將哥斯達黎加既Navas打左四場都係救左14個波。
Howard

而單單係對葡萄牙呢場,佢救左4球!
Portshot

對住同樣係歐洲球隊既葡萄牙,美國隊憑佢地既跑動距離同埋門將證明左要贏佢地確實係唔易。咁對比利時佢地會點做呢?

我係奇連士文就唔會搞D咩花巧野,繼續用體力逼使佢地就範,等佢地自己出錯。上一場比利時打少一個,體力一定消耗多左,咁就係呢點度做功夫,如果天氣夠濕夠熱,就更加有利佢地。

世界盃十六強賽前分析 - 阿根庭 vs 瑞士

阿根庭
flag-argentina-M


阿根庭好想拎冠軍,好想係無馬勒當拿既情況之下拎冠軍。

正確黎講,係美斯好想拎冠軍

因為從來無人好似美斯咁有咁多個足球先生:
阿根廷足球先生(7次):2005年,2007年,2008年,2009年,2010年,2011年,2012年
歐洲金童獎(1次):2005年
國際足聯金球獎(3次):2010年,2011年,2012年
世界足球先生(4次):2009年,2010年,2011年,2012年

同時地,佢都無任何襯得起呢堆榮譽既國家隊成績。令到一堆人(包括我)懷疑,其實真正厲害果個唔係美斯,而係球會企係佢後面既沙維?又或者咁講,會唔會無左沙維企係後面,美斯就唔識贏波?
呢次世界盃係美斯向全世界證明佢係一個球王既機會,如果佢捧到盃,就任何人都無辦法否認佢唔係一個球王。

但呢點亦成為左阿根庭既致命傷。因為阿根庭唔係哥斯達黎加,佢唔會放9個人防守然後放美斯一個係前面攻。唔會出現漫畫中既「全員防守,然後把球傳給美斯」呢D咁浪漫既戰術。

實隊上,呢隊阿根庭既球員粒粒皆星,個個都係自己踼緊既球會獨當一面。黎到世界盃,無一個人甘心做配角。所以希古恩企係禁區入面等人傳波比佢,但美斯拎住個波一定唔會傳入去比佢;又所以亞古路一直企係最前,仲前過希古恩。

用對伊朗呢場做例子,美斯、阿古路同希古恩你三個大爺可唔可以講下你地係前場做緊乜野?
passes
互相傳球數字居然係0-3球?唔講明人地以為我講緊係誤傳既數字。

咁搞法,你唔係一隊波黎,你只係十一個球員企左係度。一隊波,無可能容納幾個英雄係度,一定要有人做DIRTY WORKS。但事實呢?美斯大爺三場入面,平均每分鐘跑得87米,真係Hae到爆,你睇返其他球隊既主力,例如巴西既尼馬,佢平均一分鐘跑109米。所以話,你唔回防OK,但你可唔可以唔好連跑都唔跑?
messirun

但最過份既係,佢拎晒三場分組賽既最佳球員,點解?因為佢入波丫嘛。3場波入4球。但你可以個人主義得幾耐?如果佢真係一直咁樣踼,都拎埋個盃,OK,咁我承認佢係球王。我無野好講。

其實對尼日利亞後半段時換左個拿維斯入黎,成隊波配合即刻多左。有D人要負責跑,負責拉開空位,有D人負責衝,負責用個波,負責製造機會,咁先係一隊波黎家嘛。

佢地要對住老狐狸希斯菲特帶領既瑞士,老帥一定會特別照顧美斯,分別係搵專人照顧(俗稱一人打少一個)定係區域性地照顧(即係你去到邊度都有人跟住,車輪接力)。咁呢個時候,美斯仲傳唔傳波呢?又定係扭黎扭去扭唔過然後只有靠罰球入波?

無論點,佢都應該無得輕鬆帶波同射波,所以阿根庭既勝負其實真係睇佢個人表現,我個人呢,就覺得波唔應該係一個人踼嫁law。


瑞士
flag-switzerland-M


其實我相當睇好呢隊瑞士,主要係因為個人相當喜歡恩拿。唔係一般既喜歡,係非常喜歡,由佢踼烏甸尼斯開始,到而家佢踼拿坡里,能攻善守既佢,我一直都非常欣賞。

唔好講其他野,上圖先:
G88

前兩日比大家睇占士洛迪古斯,而家你睇恩拿,你會發現,佢覆蓋範圍更廣,傳球次數更多,跑動距離更長;唯一分別就係佢入波少好多咁解。咁無法既,佢既位置其實比較偏後,不過其實佢遠射都有一手,有時兩隊鬥守,搏到一下遠射可能就咁就贏嫁啦。

G88 gogo


OK,我承認我係偏心,的確佢唔係咩世界級球員,但人係咁嫁啦,無偏好,完全公正係「法律」應該做既事(香港就快連法治都bye bye 嫁啦,趁而家好好地珍惜自己偏心既機會,第時只有黨可以偏心,你唔可以嫁啦)

講返正題,另一個要留意既瑞士球員叫「Lichts唔識串」,丫,係Lichtsteiner。雖然個名好長好難記,但佢係呢個年代少有既純邊線球員,純到可以成條右邊比佢打晒既球員。

你無睇錯,係由攻至守,成條右邊留左比佢,23號既Shaqiri好多時都走向中間,讓出右邊通道比佢落底。直至到左第三場,希斯菲特黎個變陣,係前便安排左一個Xhaka比佢,先有得抖下。
L2

係呢個咁體力化既年代,如果踼呢條位個人跑少幾步,稍為抖一抖,都會令邊線出現好大空間比對方突擊,所以呢種踼法真係同本土人情味小鋪一樣,有得睇好睇,有得幫襯好幫襯啦。

而教練老狐狸希斯菲特當然唔會偏心,佢係真真正正識教的。大佬,七個德甲,兩個歐聯喎。你估真係好似你玩fantasy football 咁,求其點十一個名,講3至4個加埋係十既數字(咩442,433,4312)就贏到咩。

可惜既係,佢地今屆贏波既運好似唔係好足夠。主要係講法國果場,十幾分鐘,就輸一個角球;然後一開波,一個誤傳,再失一球。咁就慘啦,要攻;而呢隊法國呢,最想就係你攻佢,最好空群而出,咁失左兩球,邊有得揀,梗係空群而出。最後?大家都知道故事點發展,擅長人少打人少既法國隊,入下又一球,入下又一球,一路入到第5球。

即係話,一開始失左兩球,令瑞士要用佢唔擅長既野,去打人地最擅長既野,即係費達拿係泥地對拿度輸係好正常既事一樣。

咁對住阿根庭,我估希帥無論如何都唔會同佢對攻,同埋佢一定比我更清楚而家呢隊阿根庭既問題係邊。所以,究竟美斯先生仲可唔可以一個人踼晒,而希帥會派咩人去對付佢呢?

要睇過知啦。