星期日, 6月 29, 2014

世界盃十六強賽前分析 - 荷蘭 vs 墨西哥

荷蘭
flag-netherlands-M


如果有任何一個人同你講,荷蘭打緊進攻足球,你可以同佢講,如果長傳喪跑同斬波頂頭鎚都算係進攻足球,咁佢地咪打緊進攻足球LAW。

事實上,荷蘭入左10球,係今屆世界盃暫時入波最多既球隊,但十球入面,只有一球組織,一球遠射,其他都係長傳喪跑同頂頭鎚;當一隊波,不停咁使用長傳喪跑同死球斬波頂頭鎚黎進攻,呢種戰術,有個學名,叫「穩守突擊」。

翻查荷蘭三場的數據,會發現其實大多球員都係留係中後場既位置,留出空間比洛賓+雲佩斯喪跑。
Distribution
(荷蘭球員控球位置分佈)

講開洛賓,荷蘭呢幾年根本上就係「成也洛賓,敗也洛賓」。

點解咁講?
因為佢係一個足球黑洞黎,個波落到佢腳,未到最後一刻,完全無希望射波之前,佢都唔會傳波。
blackhole_42-vert

睇返三場既傳送數據,對澳洲,佢只係傳左20球,全隊打多過半場既球員全部傳波多過佢。全隊傳球496次,而佢只佔其中4%。

呢D數字,其實放晒係FIFA網頁,即係話,佢既對手都一定知道。簡單黎講,防守佢既球員可以假設佢唔會傳波,而佢又真係唔會傳,阿光頭仔,睇你扭得幾多個扭得幾多場。

所謂「成也洛賓,敗也洛賓」;佢順係上黎射親都入咪贏波,佢唔順時又死扭死去外圍亂射自然就浪費晒D機會。

但,其實荷蘭既成敗係取決於另一個人的,呢個人就係雲高爾,究竟班球星大帝有幾聽雲神話呢?究竟佢對球隊掌控度有幾高呢?

歷史話比我地聽,雲神只要全面掌握隊波,佢叫你走東你走東,佢叫你走西你走西,咁就會贏波(2008年帶領阿爾克瑪爾聯賽28場不敗);但佢完全對球星大帝們無辦法,帶領巴塞/拜仁等大會反而成績比預期差。

所以如果球員乖乖聽話,雲神會帶比大家勝利;相反呢,球隊會變得各自為政,一盤散沙。

對住墨西哥,墨西哥一定唔會攻你,即係話荷蘭要進攻,要組織,直至入到一球之後先可以打返自己擅長既突擊;所以勝敗其實就係睇佢入唔入到第一球啦。


墨西哥
flag-mexico-M

今屆世界盃真係五個字:巴西很潮濕

大部份歐洲球員,由細到大都未試過係咁既濕度下面踼波,所以美洲既球隊非常佔優,而墨西哥就係其中一隊。

而墨西哥今年更加放棄左堅持多年既華麗打法,改打實際足球,當大多數歐洲隊守到七十幾分鐘無氣失守既時候,墨西哥無呢個問題,佢唔會有人無啦啦就坐低抽筋,佢地全場都緊守崗位,就係為左唔好失波。

睇返數據,佢地三場分組賽都跑得比人多,補位自然就比你快。
distance

究竟呢隊墨西哥有幾實際?

下圖就係FIFA根據球員真正出現位置畫既陣式圖,可以睇到三場波入面,墨西哥都係放左8個人黎防守,中間一個杜斯山度士(10)做連接,然後一個前鋒攻。
Formation

根本由頭到尾都只係諗住守和你,而結論係,佢地三場只係失左一球。

門神吳鎮宇奧祖亞場均失0.33球。
guillermo-ochoa3

比你比較下,同一組,喀麥隆失左9球,克羅地亞失左6球,巴西都失左2球。

所以荷蘭面對既,將會係一隊一心防守既球隊。佢唔介意佢入唔到你波,拖到加時射十二碼佢當贏左。

而且地球人都知道,荷蘭人最最最最驚射十二碼。

Penalty
(歷史話比我地知,佢射左五次,贏得一次,咦?仲有個低過佢?果D3場分組賽拎1分既魚腩就唔好理佢啦)

所以如果九十分鐘荷蘭都入唔到波,加時射十二碼既機會就好大,一來你歐洲人怕熱,二來人地一開始就塞八個人係禁區頂同中場中間。

但如果九十分鐘內失波,喜歡打突擊既荷蘭就立於不敗之地了。

沒有留言: